ప్రజాదర్బార్‌కు విశేష స్పందన..
గజపతినగరం సూర్య: ప్రజలకు పాలనను మరింత చేరువ చేయడం, వారి సమస్యలను నేరుగా తెలుసుకొని సత్వర పరిష్కారం చూపించడమే లక్ష్యంగా రాష్ట్ర ప్రభుత్వం అమలు చేస్తున్న ‘ఒక నెల - ఒక నియోజకవర్గం - నాలుగు సందర్శనలు’ కార్యక్రమంలో భాగంగా గజపతినగరం నియోజకవర్గం, గజపతినగరం మండల కేంద్రంలో శుక్రవారం నిర్వహించిన ప్రజా ఫిర్యాదుల పరిష్కార వేదిక (పి.జి.ఆర్.ఎస్ - ప్రజాదర్బార్‌)కు విశేష స్పందన లభించింది. రాష్ట్ర సూక్ష్మ, చిన్న, మధ్యతరహా పరిశ్రమలు, గ్రామీణ పేదరిక నిర్మూలన, ప్రవాసాంధ్రుల సాధికారత శాఖ మంత్రి కొండపల్లి శ్రీనివాస్ ప్రజల నుంచి వినతులను స్వీకరించి, సమస్యల పరిష్కారానికి సంబంధిత అధికారులకు తగిన ఆదేశాలు జారీ చేశారు.ఈ సందర్భంగా వివిధ ప్రాంతాల నుంచి వచ్చిన ప్రజలు రెవెన్యూ, భూ సమస్యలు, వ్యక్తిగత సమస్యలు, గ్రామాల్లో మౌలిక సదుపాయాల కొరత తదితర అంశాలపై వినతులు సమర్పించారు. ప్రతి అర్జీని పరిశీలించిన మంత్రి, సంబంధిత అధికారులు సమగ్ర విచారణ జరిపి, అర్హతలు, నిబంధనల మేరకు న్యాయవంతంగా పరిష్కార చర్యలు చేపట్టాలని సూచించారు. ప్రజలు తమ సమస్యల పరిష్కారం కోసం పదేపదే ప్రభుత్వ కార్యాలయాల చుట్టూ తిరగాల్సిన పరిస్థితి లేకుండా బాధ్యతాయుతంగా సేవలు అందించాలని స్పష్టం చేశారు. ఈ కార్యక్రమంలో జిల్లా, మండల స్థాయి వివిధ శాఖల అధికారులు పాల్గొన్నారు.
