అమలాపురం పార్లమెంట్ సమన్వయకర్తగా ఎమ్మెల్యే గిడ్డి సత్యనారాయణ

సూర్య నియోజకవర్గ బ్యూరో (డాక్టర్ బి.ఆర్. అంబేద్కర్ కోనసీమ జిల్లా / పి.గన్నవరం): జనసేన పార్టీ అమలాపురం పార్లమెంట్ సమన్వయకర్తగా నియమితులైన పి.గన్నవరం శాసనసభ్యులు గిడ్డి సత్యనారాయణ, పార్టీ అధిష్టానం నూతనంగా ప్రకటించిన సమన్వయ కమిటీ సభ్యులకు, నిర్వాహక దళ్ సభ్యులకు, సపోర్ట్ టీమ్‌కు ప్రత్యేక ధన్యవాదాలు తెలియజేశారు.

ఈ సందర్భంగా ఎమ్మెల్యే గిడ్డి సత్యనారాయణ మాట్లాడుతూ.. జనసేన పార్టీ అధినేత, ఆంధ్రప్రదేశ్ ఉప ముఖ్యమంత్రి కొణిదెల పవన్ కళ్యాణ్ తనపై ఉంచిన విశ్వాసాన్ని నిలబెట్టుకుంటానని స్పష్టం చేశారు. నాయకత్వం అప్పగించిన బాధ్యతలను తు.చ. తప్పకుండా, పూర్తి నిబద్ధతతో నిర్వహిస్తానని భరోసా ఇచ్చారు. అమలాపురం పార్లమెంట్ పరిధిలోని అన్ని నియోజకవర్గాల్లో పార్టీని క్షేత్రస్థాయి నుంచి మరింత పటిష్టం చేసేందుకు నాయకులు, క్రియాశీల కార్యకర్తలతో నిరంతరం సమన్వయం చేసుకుంటూ ముందుకు సాగుతానని పేర్కొన్నారు.

రాబోయే స్థానిక సంస్థల ఎన్నికల్లో జనసేన పార్టీ ఘన విజయం సాధించడమే లక్ష్యంగా ప్రతి ఒక్కరూ సమష్టిగా శ్రమించాలని ఆయన పిలుపునిచ్చారు. పార్టీ మూల సిద్ధాంతాలను ప్రతి గడపకూ తీసుకెళ్లడంతో పాటు, ప్రజల సమస్యల పరిష్కారానికి నిరంతరం అండగా ఉంటూ ప్రజాసేవలో ముందుంటానని ఎమ్మెల్యే గిడ్డి తేల్చిచెప్పారు.