వేమగిరిలో ముంపు సమస్యకు శాశ్వత పరిష్కారం :రీ సర్వే చేసి భారీ మురుగు కాలువ నిర్మిస్తాం: ఎమ్మెల్యే గోరంట్ల

కడియం, మేజర్ న్యూస్, :కడియం మండలం వేమగిరిలో ముంపు సమస్యకు శాశ్వత పరిష్కారం చూపేలా భారీ మురుగు కాలువ నిర్మాణానికి ప్రణాళికలు సిద్ధం చేయాలని రాజమహేంద్రవరం రూరల్ ఎమ్మెల్యే గోరంట్ల బుచ్చయ్య చౌదరి అధికారులను ఆదేశించారు. కొండ కాలువ ఆక్రమణలకు గురైందన్న ఫిర్యాదుల నేపథ్యంలో శనివారం దేవీ జనార్ధన్ నగర్, కేవీఆర్ లేఅవుట్ తదితర ప్రాంతాల్లో ఆయన పర్యటించి పరిస్థితులను పరిశీలించారు.

.కొండ కాలువ మార్గంలో మోటార్‌సైకిల్‌పై పర్యటించిన ఎమ్మెల్యే, మురుగు నీటి ప్రవాహానికి ఉన్న ఇబ్బందులను క్షుణ్ణంగా పరిశీలించారు. ఈ సందర్భంగా కొండ కాలువ ప్రాంతంలో గత 35 ఏళ్లుగా నివాసం ఉంటున్న 67 నిరుపేద కుటుంబాలకు చెందిన మహిళలు తమ ఇళ్లను తొలగిస్తే తమ పరిస్థితి ఏమిటని ఎమ్మెల్యే ఎదుట ఆవేదన వ్యక్తం చేశారు.

దీనిపై స్పందించిన గోరంట్ల బుచ్చయ్య చౌదరి, గ్రామంలో ముంపు సమస్య తలెత్తకుండా కొండ కాలువకు రీ సర్వే నిర్వహించి, భారీ మురుగు కాలువ నిర్మాణానికి చర్యలు చేపడతామని హామీ ఇచ్చారు. అనంతరం అక్కడి నుంచే సంబంధిత అధికారులతో మాట్లాడి నిర్మాణానికి అవసరమైన ప్రణాళికలు సిద్ధం చేయాలని ఆదేశించారు.ఈ పర్యటనలో మాజీ ఎంపీపీ వెలుగుబంటి ప్రసాద్, చెల్లుబోయిన శ్రీనివాస్, సూరపురెడ్డి జానకిరామ్, కొప్పిశెట్టి నాగేశ్వరరావు, కోలా శ్రీనివాస్, అల్లంపల్లి ప్రసాద్, ఈడుపుగంటి బుజ్జి, దంగేటి శ్రవణ్ కుమార్, ద్రాక్షరపు వాసు తదితరులు పాల్గొన్నారు.