ఠానేలంక గురుకులంలో న్యాయ విజ్ఞాన సదస్సు...విద్యార్థినులతో మేజిస్ట్రేట్ ముఖాముఖి...
ముమ్మిడివరం, మేజర్ న్యూస్ ఆంధ్రప్రదేశ్ హైకోర్టు ఆదేశాల మేరకు డాక్టర్ బి.ఆర్ అంబేద్కర్ కోనసీమ జిల్లా ముమ్మిడివరం మండల లీగల్ సర్వీస్ కమిటీ ఆధ్వర్యంలో ఠానేలంక గురుకుల పాఠశాలలో ముమ్మిడివరం స్పెషల్ జ్యుడీషియల్ సెకండ్ క్లాస్ మేజిస్ట్రేట్ దాసరి సత్యనారాయణ అధ్యక్షతన ఘనంగా న్యాయ విజ్ఞాన సదస్సు నిర్వహించారు.
ఈ సందర్భంగా మేజిస్ట్రేట్ పాఠశాల ఆవరణను క్షుణ్ణంగా పరిశీలించి, బాలికల వసతి గృహాన్ని సందర్శించి విద్యార్థినులతో నేరుగా ముఖాముఖి మాట్లాడి వారి సమస్యలను అడిగి తెలుసుకున్నారు. ఈ క్రమంలో పాఠశాలలో ఆడుకోవడానికి ఆట స్థలం గ్రౌండ్ లేకపోవడం, హాస్టల్‌లో పడుకోవడానికి తగినన్ని బెడ్స్ మంచాలు సదుపాయం కరువవ్వడం, మరియు బాలికల రక్షణకు అత్యంత కీలకమైన హాస్టల్ చుట్టూ ఉన్న సీసీ కెమెరాలు సక్రమంగా పనిచేయకపోవడం వంటి తీవ్రమైన సమస్యలను విద్యార్థినులు ఆయన దృష్టికి తీసుకువచ్చారు.
దీనిపై మేజిస్ట్రేట్ స్పందిస్తూ, ఈ సమస్యలన్నింటినీ తక్షణమే నివేదిక రూపంలో ప్రభుత్వం మరియు ఉన్నతాధికారుల దృష్టికి తీసుకెళ్లి త్వరలోనే పరిష్కరిస్తామని, విద్యార్థినులు ఎలాంటి ఇబ్బందులు ఉన్నా అధిగమించి పట్టుదలతో చదువుకుని ఉన్నత శిఖరాలను అధిరోహించాలని ఆకాంక్షించారు. అదేవిధంగా, విద్యార్థినులకు అనారోగ్యం వస్తే కేవలం పీహెచ్‌సీకి తరలించడం మాత్రమే కాకుండా, వైద్య సిబ్బంది మరియు హెల్త్ అసిస్టెంట్లే స్వయంగా క్రమం తప్పకుండా హాస్టల్‌ను సందర్శించి వైద్య పరీక్షలు నిర్వహించాలని, విద్యార్థుల ఆరోగ్య భద్రతను కాపాడాల్సిన కనీస బాధ్యత వైద్య బృందంపై ఉందని స్పష్టం చేస్తూ తగిన ఆదేశాలు జారీ చేశారు.
