ఎన్నికల ప్రశాంత నిర్వహణకు పోలీసుల ముందస్తు చర్యలు :సీఐ వెంకటేశ్వరరావు
కడియం,మేజర్ న్యూస్ ,రాబోయే స్థానిక సంస్థల ఎన్నికలను ప్రశాంత వాతావరణంలో, ఎలాంటి అవాంఛనీయ సంఘటనలకు తావులేకుండా నిర్వహించేందుకు పోలీసులు ముందస్తు చర్యలు చేపడుతున్నారు. ఇందులో భాగంగా కడియం మండలంలోని వివిధ గ్రామాల్లో ఏర్పాటు చేయనున్న పోలింగ్‌ కేంద్రాలను సీఐ ఏ. వెంకటేశ్వరరావు, ఎస్‌ఐ నాగదుర్గాప్రసాద్, ఏఎస్ఐ వెంకటరమణ క్షేత్రస్థాయిలో పరిశీలించారు.
ఈ సందర్భంగా పోలింగ్‌ కేంద్రాల్లో మౌలిక వసతులు, భద్రతా ఏర్పాట్లు, ఇతర సౌకర్యాలను తనిఖీ చేశారు. ఎన్నికల నిర్వహణలో ఎదురయ్యే సమస్యలను ముందుగానే గుర్తించి, అవసరమైన చర్యలు తీసుకునేలా పరిశీలన చేపట్టారు. గుర్తించిన లోటుపాట్లపై ఉన్నతాధికారులకు నివేదిక అందజేయనున్నట్లు పోలీసు అధికారులు తెలిపారు.
ఎన్నికల సమయంలో శాంతిభద్రతలకు విఘాతం కలగకుండా, ఓటర్లు నిర్భయంగా తమ ఓటు హక్కును వినియోగించుకునేలా ముందస్తు భద్రతా ఏర్పాట్లపై దృష్టి సారించినట్లు అధికారులు వెల్లడించారు.
