రావులపాలెం - పలివెల రహదారి అభివృద్ధికి రూ.20 కోట్ల నిధులు మంజూరు: ఎమ్మెల్యే బండారు సత్యానందరావు వెల్లడి!

రావులపాలెం బ్రిడ్జి నుంచి వెదిరేశ్వరం మీదుగా పలివెల బ్రిడ్జి వరకు గల సుమారు 9 కిలోమీటర్ల మేర ప్రధాన రహదారిని బీటీ రోడ్డుగా అభివృద్ధి చేసేందుకు రూ.20 కోట్ల నిధులు మంజూరైనట్లు కొత్తపేట శాసనసభ్యులు బండారు సత్యానందరావు వెల్లడించారు.

జాతీయ రహదారి 216E పరిధిలోని ఈ మార్గంలో పనుల విభజన వివరాలను ఎమ్మెల్యే స్పష్టం చేశారు. ఇందులో భాగంగా కిలోమీటర్ 22.730 నుంచి 27.600 వరకు బీటీ రోడ్డు నిర్మాణానికి రూ.10 కోట్లు, అలాగే కిలోమీటర్ 27.600 నుంచి 31.710 వరకు మరో రూ.10 కోట్లు కేటాయించినట్లు తెలిపారు. ప్రస్తుతం ఈ మార్గంలో దెబ్బతిన్న మెటల్ రోడ్డు కారణంగా వాహనదారులు, స్థానిక ప్రయాణికులు తీవ్ర అవస్థలు పడుతున్నారని, తాజా నిధుల మంజూరుతో ఆ సమస్యలకు శాశ్వత పరిష్కారం లభించనుందని పేర్కొన్నారు.

ఈ రోడ్డు నిర్మాణానికి సంబంధించి త్వరలోనే అధికారిక టెండర్లు పిలిచి, రాబోయే మూడు నెలల వ్యవధిలోనే క్షేత్రస్థాయిలో పనులు ప్రారంభిస్తామని ఎమ్మెల్యే వివరించారు. అంతేకాకుండా, వచ్చే ఏడాది ఈ రహదారి విస్తరణతో పాటు పూర్తి స్థాయి అభివృద్ధి పనులను చేపట్టనున్నట్లు బండారు సత్యానందరావు స్పష్టం చేశారు.