పోచమ్మ తల్లి ఆలయ అభివృద్ధికి భక్తుల సంకల్ప దీక్ష

కుల్కచర్ల, మేజర్ న్యూస్ (అక్టోబర్ 11):

కుల్కచర్ల మండల కేంద్రంలోని గ్రామదేవత శ్రీశ్రీశ్రీ పోచమ్మ తల్లి ఆలయ పునర్నిర్మాణం, ధ్వజస్తంభ ప్రతిష్ఠాపన కార్యక్రమాలు విజయవంతం కావాలని ఆకాంక్షిస్తూ దళిత యువశక్తి సంఘం ఆధ్వర్యంలో భక్తులు అమ్మవారి మాలధారణ కార్యక్రమాన్ని భక్తిశ్రద్ధలతో నిర్వహించారు. దేవి శరన్నవరాత్రులను పురస్కరించుకొని ఆలయ అభివృద్ధి పనులు ఎలాంటి ఆటంకాలు లేకుండా పూర్తికావాలని సంకల్పిస్తూ దీక్ష చేపట్టారు.గ్రామదేవత పోచమ్మ తల్లి ఆశీస్సులతో గ్రామ ప్రజలు సుఖసంతోషాలతో ఉండాలని, ఆయురారోగ్యాలతో వర్ధిల్లాలని, గ్రామంలో ఐకమత్యం వెల్లివిరియాలని భక్తులు ప్రార్థించారు. ఆలయ పునర్నిర్మాణం, ధ్వజస్తంభ ప్రతిష్ఠాపనతో ఆలయానికి మరింత శోభ చేకూరడంతో పాటు భక్తులకు మెరుగైన సౌకర్యాలు అందుబాటులోకి వస్తాయని ఆశాభావం వ్యక్తం చేశారు.దళిత యువశక్తి సంఘం ఆధ్వర్యంలో నిర్వహించిన మాలధారణ కార్యక్రమం యువతలో భక్తిభావాన్ని పెంపొందించడంతో పాటు సామాజిక ఐక్యతకు ప్రతీకగా నిలిచింది. గ్రామదేవత ఆలయ అభివృద్ధికి యువత ముందుకు రావడం అభినందనీయమని స్థానికులు పేర్కొన్నారు. ఆలయ అభివృద్ధి పనులు త్వరగా పూర్తై భక్తులకు మరిన్ని సౌకర్యాలు అందుబాటులోకి రావాలని ఆకాంక్షించారు.

రిపోర్టర్: వడ్ల వినోద్ కుమార్, కుల్కచర్ల, వికారాబాద్ జిల్లా.