మొయినాబాద్‌లో ఘోర రోడ్డు ప్రమాదం

బైక్‌ను ఢీకొన్న కారు.. యువకుడి దుర్మరణం!

తలకు తీవ్ర గాయాలతో ఆస్పత్రికి తరలింపు.. అప్పటికే మృతి

మొయినాబాద్‌లో జరిగిన రోడ్డు ప్రమాదం ఓ కుటుంబంలో విషాదం నింపింది. ద్విచక్ర వాహనాన్ని కారు ఢీకొట్టిన ఘటనలో మొయినాబాద్‌కు చెందిన దుబ్బా సుభాష్‌ (35) మృతి చెందాడు. గురువారం ఉదయం జరిగిన ఈ ప్రమాదంలో మరో వ్యక్తి కూడా ద్విచక్ర వాహనంపై ఉన్నట్లు తెలిసింది.

పోలీసులకు అందిన ఫిర్యాదు వివరాల ప్రకారం.. మొయినాబాద్‌కు చెందిన సుభాష్‌ ప్రైవేట్‌ ఉద్యోగిగా పనిచేస్తున్నాడు. గురువారం ఉదయం సుమారు 7 గంటలకు తన ద్విచక్ర వాహనం (TS 07 GK 54525)పై హైదరాబాద్‌ వైపు బయలుదేరాడు. అతనితో పాటు మొయినాబాద్‌ సురభిలో నివాసముంటున్న ఛత్తీస్‌గఢ్‌కు చెందిన జయావంత్‌ (41) అనే సెంట్రింగ్‌ కార్మికుడు కూడా ఉన్నాడు.

ఈ క్రమంలో హైదరాబాద్‌ వైపు నుంచి వస్తున్న కారు (TS 07 HC 3402)ను డ్రైవర్‌ పూతరి నవీన్‌ అతివేగంగా, నిర్లక్ష్యంగా నడుపుతూ వచ్చి ద్విచక్ర వాహనాన్ని ఢీకొట్టినట్లు ఫిర్యాదులో పేర్కొన్నారు. ఈ ప్రమాదంలో సుభాష్‌ తలకు తీవ్ర గాయాలై రక్తస్రావం కావడంతో చికిత్స నిమిత్తం భాస్కర్‌ ఆస్పత్రికి తరలించారు. అయితే, అప్పటికే అతడు మృతి చెందినట్లు వైద్యులు నిర్ధారించినట్లు సమాచారం. ఘటనపై పోలీసులు కేసు నమోదు చేసి దర్యాప్తు చేస్తున్నారు.

మొయినాబాద్, మేజర్ న్యూస్ (అక్టోబర్ 8):