గ్రాడ్యుయేట్లు బాధ్యతగా ఓటరు నమోదు చేసుకోవాలి: కౌన్సిలర్ డా. ఉదయజ్యోతి

*గ్రాడ్యుయేట్లు బాధ్యతగా ఓటరు నమోదు చేసుకోవాలి: కౌన్సిలర్ డా. ఉదయజ్యోతి*

ఎమ్మెల్సీ ఓటర్ల నమోదుపై బీఆర్‌ఎస్ నాయకుల అవగాహన సమావేశం

అశ్వారావుపేటలో 1,000 గ్రాడ్యుయేట్ ఓట్ల నమోదే లక్ష్యం: కాసాని చంద్రమోహన్

అర్హులైన ప్రతి పట్టభద్రుడు ఓటరుగా నమోదు కావాలి: సత్యవరపు సంపూర్ణ

రాకేష్ రెడ్డి గెలుపు కోసం కృషి చేయాలి: బీఆర్‌ఎస్ నాయకుల పిలుపు

పట్టభద్రుల ఎమ్మెల్సీ ఎన్నికల నేపథ్యంలో అర్హులైన ప్రతి గ్రాడ్యుయేట్ ఓటరుగా నమోదు చేసుకుని తమ ఓటు హక్కును వినియోగించుకోవాలని బీఆర్‌ఎస్ నాయకులు పిలుపునిచ్చారు. అశ్వారావుపేట మున్సిపాలిటీ పరిధిలోని పెరయిగూడెంలోని తగరం జగన్నాథం స్వగృహంలో బీఆర్‌ఎస్ నాయకులు, కార్యకర్తల అవగాహన సమావేశం నిర్వహించారు.

ఈ సందర్భంగా మున్సిపల్ కౌన్సిలర్ డా. ఉదయజ్యోతి మాట్లాడుతూ, పట్టభద్రుల ఎమ్మెల్సీ ఎన్నికలు యువత, విద్యార్థులు, నిరుద్యోగుల భవిష్యత్తుతో ముడిపడి ఉన్నాయని అన్నారు. ప్రజా సమస్యలను చట్టసభల్లో సమర్థంగా ప్రస్తావించే నాయకులను ఎన్నుకునే బాధ్యత గ్రాడ్యుయేట్లపై ఉందన్నారు. అర్హులైన ప్రతి గ్రాడ్యుయేట్ ఓటరుగా నమోదు కావడంతో పాటు బాధ్యతాయుతంగా ఓటు హక్కును వినియోగించుకోవాలని కోరారు.

బీఆర్‌ఎస్ నాయకుడు కాసాని చంద్రమోహన్ మాట్లాడుతూ పట్టభద్రుల ఎమ్మెల్సీ ఎన్నికల ఓటర్ల నమోదు ప్రక్రియ ప్రారంభమైందని, నవంబర్‌ 6 వరకు కొనసాగుతుందని తెలిపారు. గత ఎన్నికల్లో అశ్వారావుపేట ప్రాంతం నుంచి 756 మంది ఓటర్లను నమోదు చేయించామని, ఈసారి 1,000కిపైగా గ్రాడ్యుయేట్ ఓటర్ల నమోదును లక్ష్యంగా పెట్టుకున్నామని చెప్పారు.

అశ్వారావుపేట పట్టణంతో పాటు వినాయకపురం, తిరుమలకుంట, నారాయణపురం, గుమ్మడివల్లి తదితర ప్రాంతాల్లో ఓటరు నమోదు కోసం బాధ్యులను నియమించినట్లు తెలిపారు. రాబోయే ఎమ్మెల్సీ ఎన్నికల్లో రాకేష్ రెడ్డి గెలుపు కోసం పార్టీ శ్రేణులు సమన్వయంతో పనిచేయాలని పిలుపునిచ్చారు.

డిగ్రీ పూర్తి చేసిన అర్హులైన పట్టభద్రులు ఆధార్ కార్డు, ఓటర్ ఐడీ, డిగ్రీ సర్టిఫికెట్, ఫొటోలను పీడీఎఫ్ రూపంలో వాట్సాప్ ద్వారా పంపించి ఓటరుగా నమోదు చేసుకోవచ్చన్నారు. ఈ ప్రక్రియ పూర్తిగా ఉచితమని, అర్హులైన పట్టభద్రులు ఈ అవకాశాన్ని సద్వినియోగం చేసుకోవాలని కోరారు.

బీఆర్‌ఎస్ టౌన్ మాజీ అధ్యక్షుడు సత్యవరపు సంపూర్ణ మాట్లాడుతూ రాష్ట్రంలో త్వరలో జరగనున్న ఎమ్మెల్సీ ఎన్నికల నేపథ్యంలో అర్హులైన గ్రాడ్యుయేట్లందరూ తప్పనిసరిగా ఓటరుగా నమోదు చేసుకోవాలని కోరారు. పార్టీ నాయకులు, కార్యకర్తలు, కుటుంబ సభ్యులు అర్హులైన పట్టభద్రులను గుర్తించి నమోదు ప్రక్రియలో సహకరించాలని సూచించారు. రాకేష్ రెడ్డి గెలుపు కోసం ప్రతి ఒక్కరూ భాగస్వాములు కావాలని పిలుపునిచ్చారు.

ఈ సమావేశంలో బీఆర్‌ఎస్ నాయకులు కాసాని నాగశేష పద్మ, డాక్టర్ భూక్య ప్రసాద్, గుడవర్తి వెంకటేశ్వరరావు, సింగరేణి రిటైర్డ్ ఉద్యోగి జుజ్జురపు శ్రీరామమూర్తి, మొటూరి మొహన్ శెట్టిపల్లి రఘురాం జుజ్జురపు రాంబాబు మాజీ సర్పంచ్ కొండయ్య మాజీ సర్పంచ్ శివప్రసాద్ మాజీ ఉపసర్పంచ్ జగన్నాథం నరేష్ మంగరాజు అమీర్ , చిన్నబ్బాయ్, కార్యకర్తలు, యువత, స్థానికులు పాల్గొన్నారు.

సూర్య ప్రతినిధి మునీర్ అశ్వారావుపేట