పల్లెల అభివృద్ధి కూటమి ప్రభుత్వంతోనే సాధ్యం తురకపల్లిలో రూ.10 లక్షలతో సీసీ రోడ్ల నిర్మాణానికి భూమిపూజ
అనంతపురం బ్యూరో : గ్రామీణ ప్రాంతాల అభివృద్ధికి కూటమి ప్రభుత్వం ప్రాధాన్యతనిస్తోందని గుంతకల్లు ఎమ్మెల్యే గుమ్మనూరు జయరాం పేర్కొన్నారు. గుత్తి మండలం తురకపల్లి గ్రామంలో శుక్రవారం నిర్వహించిన ‘పల్లె పండుగ 3.0’ కార్యక్రమంలో రాష్ట్ర కార్మిక సంక్షేమ బోర్డు చైర్మన్ వెంకట శివుడు యాదవ్‌తో కలిసి ఆయన ముఖ్య అతిథిగా పాల్గొన్నారు. ఈ సందర్భంగా రూ.10 లక్షల వ్యయంతో చేపట్టనున్న సీసీ రోడ్ల నిర్మాణ పనులకు భూమిపూజ చేసి శంకుస్థాపన చేశారు.
గ్రామానికి చేరుకున్న ఎమ్మెల్యే గుమ్మనూరు జయరాం, వెంకట శివుడు యాదవ్‌లకు స్థానిక టీడీపీ నాయకులు, గ్రామస్థులు ఘన స్వాగతం పలికారు. అనంతరం జరిగిన కార్యక్రమంలో ఎమ్మెల్యే మాట్లాడుతూ గ్రామాలు, పట్టణాల అభివృద్ధికి కూటమి ప్రభుత్వం కృషి చేస్తోందన్నారు. స్థానిక సంస్థల ఎన్నికల్లో కూటమి అభ్యర్థులను గెలిపించాలని పిలుపునిచ్చారు.
గ్రామస్థులు మాట్లాడుతూ గుత్తి పట్టణంలోని టీడీపీ కార్యాలయంలో నిర్వహించిన ప్రజాదర్బార్‌లో తమ గ్రామానికి సీసీ రోడ్లు కావాలని వినతిపత్రం అందజేశామని తెలిపారు. తమ విజ్ఞప్తిపై స్పందించి నిధులు మంజూరు చేసిన ఎమ్మెల్యే గుమ్మనూరు జయరాం, యువనేత గుమ్మనూరు ఈశ్వర్‌లకు కృతజ్ఞతలు తెలిపారు. రానున్న స్థానిక సంస్థల ఎన్నికల్లో సర్పంచ్ స్థానాన్ని భారీ మెజార్టీతో గెలుచుకుని ఎమ్మెల్యేకు బహుమతిగా అందిస్తామని పేర్కొన్నారు.
ఈ కార్యక్రమంలో ప్రభుత్వ అధికారులు, తురకపల్లి టీడీపీ నాయకులు, కార్యకర్తలు, గుత్తి మండల, పట్టణ కూటమి నాయకులు, అనుబంధ కమిటీల సభ్యులు పెద్ద సంఖ్యలో పాల్గొన్నారు.
