ముల్కనూరు సహకార ప్రస్థానంపై విదేశీ ప్రతినిధుల ఆసక్తి
ముల్కనూర్‌ సహకార ప్రస్థానంపై విదేశీ ప్రతినిధుల ఆసక్తి
ఎంసిఆర్బి ని పరిశీలించిన 18 దేశాల బృందం
భీమదేవరపల్లి, అక్టోబర్ 02(మేజర్ న్యూస్ సూర్య):
భారత విదేశాంగ మంత్రిత్వ శాఖ ఆధ్వర్యంలోని ఐటీఈసీ కార్యక్రమంలో శిక్షణ పొందుతున్న 18 దేశాలకు చెందిన అధికారులు, జర్నలిస్టులు శుక్రవారం ముల్కనూర్‌ సహకార గ్రామీణ పరపతి, మార్కెటింగ్‌ సంఘాన్ని సందర్శించారు. డా. మర్రి చెన్నారెడ్డి మానవ వనరుల అభివృద్ధి సంస్థ ఆధ్వర్యంలో జరుగుతున్న శిక్షణలో భాగంగా ఈ పర్యటన చేపట్టారు. ఈ సందర్భంగా మహాత్మాగాంధీ చిత్రపటానికి నివాళులర్పించి, జాతీయ గీతాలాపనతో కార్యక్రమాన్ని ప్రారంభించారు. సంఘం అధ్యక్షుడు అలిగిరెడ్డి ప్రవీణ్‌రెడ్డి పవర్‌పాయింట్‌ ప్రజెంటేషన్‌ ద్వారా సంఘం ఆవిర్భావం, అభివృద్ధి, రైతులకు అందిస్తున్న సేవలను వివరించారు. అనంతరం ప్రతినిధులు వ్యవసాయ ఉత్పత్తుల సేకరణ, ప్రాసెసింగ్‌, విలువ జోడింపు విభాగాలను పరిశీలించారు. తర్వాత ముల్కనూర్‌ మహిళా సహకార డెయిరీని సందర్శించారు. డెయిరీ జీఎం మార్పాటి భాస్కర్‌రెడ్డి పాల సేకరణ, ప్రాసెసింగ్‌, నాణ్యత నియంత్రణ, మార్కెటింగ్‌ విధానాలను వివరించారు. గ్రామీణ మహిళల ఆర్థిక సాధికారతలో డెయిరీ పాత్రను ప్రతినిధులు అభినందించారు. రైతుల భాగస్వామ్యం, పరస్పర విశ్వాసంతో ముల్కనూర్‌ సహకార సంఘం ఎదిగిన తీరు స్ఫూర్తిదాయకమని వారు పేర్కొన్నారు.
