కరువు రైతులకు నష్టపరిహారం చెల్లించాలి

తిరుపతి జిల్లాను వెంటనే కరువు జిల్లాగా ప్రకటించి, నష్టపోయిన రైతులకు నష్టపరిహారం చెల్లించాలని ఏపీ రైతు సంఘం రాష్ట్ర ఉపాధ్యక్షులు ఏ.రామానాయుడు ప్రభుత్వాన్ని డిమాండ్ చేశారు. గంధమనేని శివయ్య భవన్ లో గురువారం జరిగిన ఏపీ రైతు సంఘం ముఖ్య నాయకుల సమావేశంలో ఆయన మాట్లాడారు. జిల్లాలో నెలకొన్న వర్షాభావ పరిస్థితులపై ప్రభుత్వం వెంటనే సమగ్ర సర్వే నిర్వహించి మండలాల వారీగా పంట నష్టం అంచనా వేయాలన్నారు. పంటలు సాగు చేయలేక, సాగు చేసిన పంటలకు నీరు అందక రైతులు తీవ్ర ఆర్థిక ఇబ్బందులు ఎదుర్కొంటున్నారని ఆవేదన వ్యక్తం చేశారు.కరువు ప్రకటనలో ఆలస్యం చేయకుండా తక్షణ చర్యలు చేపట్టాలని కోరారు. కార్యక్రమంలో జిల్లా గౌరవ అధ్యక్షులు మునిరత్నం, జిల్లా అధ్యక్షులు బెల్లంకొండ శ్రీనివాసులు, ఉపాధ్యక్షులు గోవిందయ్య, సహాయ కార్యదర్శి పద్మనాభ రెడ్డి, నాయకులు రాము పాల్గొన్నారు.

సీఎం గౌడ్ తిరుపతి ప్రతినిధి