ఉపాధి హామీ పథకాన్ని పునరుద్ధరించాలి

ఉపాధి హామీ పథకాన్ని పునరుద్ధరించాలి

గాంధీ విగ్రహానికి కార్మిక సంఘం వినతి

భీమదేవరపల్లి, అక్టోబర్ 02 (మేజర్ న్యూస్ సూర్య):

మహాత్మాగాంధీ జాతీయ గ్రామీణ ఉపాధి హామీ పథకాన్ని పునరుద్ధరించాలని తెలంగాణ వ్యవసాయ కార్మిక సంఘం మండల కమిటీ నాయకులు డిమాండ్‌ చేశారు. గాంధీ జయంతిని పురస్కరించుకుని శుక్రవారం గాంధీ విగ్రహానికి పలు డిమాండ్లతో కూడిన వినతిపత్రాన్ని సమర్పించి నిరసన వ్యక్తం చేశారు. ఈ సందర్భంగా మండల కార్యదర్శి అజ్మీర బిక్షపతి మాట్లాడుతూ.. వి.బి.జి. రామ్‌జీ చట్టాన్ని రద్దు చేసి, ఉపాధి హామీ పథకాన్ని పటిష్ఠంగా అమలు చేయాలని కోరారు. పెండింగ్‌ బిల్లులను వెంటనే విడుదల చేయడంతో పాటు ఏడాదికి 200 రోజుల పని కల్పించాలని డిమాండ్‌ చేశారు. రోజువారీ కూలీని రూ.800కు పెంచాలని, కొత్త జాబ్‌కార్డులు జారీ చేయాలని కోరారు. పని ప్రదేశాల్లో కార్మికులకు అవసరమైన సౌకర్యాలు కల్పించాలని విజ్ఞప్తి చేశారు. ఈ కార్యక్రమంలో సంపత్‌, సురేష్‌, ఉప్పలయ్య, మల్లేశం, నందం తదితరులు పాల్గొన్నారు.