దేవాలయాల్లో వరుస చోరీలకు పాల్పడుతున్న వ్యక్తి అరెస్ట్

-రూ.1.65 లక్షల విలువైన ఆభరణాలు స్వాధీనం చేసుకున్న పోలీసులు…

దేవాలయాలలో వరుస చోరీలకు పాల్పడుతున్న నాగర్ కర్నూల్ జిల్లా పెద్ద కొత్తపల్లి మండలం గంటరావుపల్లి గ్రామానికి చెందిన పెద్ద ముక్కుల ఈశ్వర్ ను  అరెస్టు చేసినట్లు సీఐ వెంకటేశ్వర్లు చెప్పారు. నిందితుని నుండి 1. 65 లక్షల విలువ చేసే ఆభరణాలు స్వాధీనం చేసుకున్నట్లు ఆయన వివరించారు. శుక్రవారం ఆమనగల్లు పోలీస్ స్టేషన్ లో  ఏర్పాటుచేసిన సమావేశంలో ఆయన మాట్లాడుతూ గత నెల 29న రాత్రి ఆమనగల్లు మున్సిపాలిటీ పరిధిలోని విటాయిపల్లి గ్రామ సమీపంలోని హనుమాన్ ఆలయంతో పాటు పెద్దమ్మ దేవాలయంలో తాళాలు పగలగొట్టి బంగారు, వెండి, ఇత్తడి, రాగి వస్తువులు చోరీ కి పాల్పడినట్లు ఆలయ పూజారి సభావట్ లక్ష్మణ్ ఫిర్యాదు మేరకు కేసు నమోదు చేసినట్లు తెలిపారు. విచారణలో భాగంగా సాంకేతిక ఆధారాలతో నిందితున్ని గుర్తించి అరెస్టు చేసినట్లు చెప్పారు. గతంలో నిందితుడు మున్సిపాలిటీ లోని దేవాలయాలతో పాటు పెద్ద కొత్తపల్లి, పాన్ గల్, గంట రావు పల్లి, కందుకూరు, కడ్తాల్ గ్రామాలలోని ఆలయాలలో చోరీ కి పాల్పడినట్లు విచారణలో వెల్లడైనట్లు ఆయన పేర్కొన్నారు. ఈ మేరకు నిందితుని పై ఆయా పోలీస్ స్టేషన్లో కేసులు నమోదైనట్లు తెలిపారు. కేసును చాలెంజ్ గా తీసుకొని ఫ్యూచర్ సిటీ కమిషనర్ ఆదేశాల మేరకు  మహేశ్వరం డిసిపి నారాయణరెడ్డి, ఏసీపి జానకి రెడ్డి ల పర్యవేక్షణలో సీఐ వెంకటేశ్వర్లు ఆధ్వర్యంలో ఏఎస్ఐ రామ్ రెడ్డి, హెడ్ కానిస్టేబుల్ రాజేందర్, కానిస్టేబుల్లు శివకుమార్, మల్లయ్య లు చాకచక్యంగా వ్యవహరించి నిందితున్ని అరెస్టు చేసి చోరీ కి పాల్పడిన వస్తువులను సాధ్యం చేసుకున్నట్లు ఆయన వివరించారు. కేసు చేధన లో చాకచక్యంగా వ్యవహరించిన పోలీస్ అధికారి, సిబ్బందికి అవార్డులు అందజేయనున్నట్లు సీఐ వెంకటేశ్వర్లు చెప్పారు.
ఎ. చంద్రశేఖర్: మేజర్ న్యూస్, ఆమనగల్లు.