శంషాబాద్ ఎయిర్‌పోర్టులో హైటెన్షన్..
టేకాఫ్ సమయంలో విమానం ఎమర్జెన్సీ డోర్ తెరిచేందుకు యత్నం !
కడపకు బయలుదేరిన ఇండిగో విమానంలో ప్రయాణికుడి హల్‌చల్.. పోలీసులకు అప్పగింత
శంషాబాద్ అంతర్జాతీయ విమానాశ్రయంలో అర్ధరాత్రి తీవ్ర కలకలం చోటుచేసుకుంది. టేకాఫ్ అవుతున్న విమానంలో ఓ ప్రయాణికుడు హల్‌చల్ చేయడంతో విమానాశ్రయంలో ఒక్కసారిగా ఉద్రిక్త పరిస్థితులు నెలకొన్నాయి. కడపకు బయలుదేరిన ఇండిగో విమానంలో ఈ ఘటన చోటుచేసుకుంది.
వివరాల్లోకి వెళ్తే.. శంషాబాద్ అంతర్జాతీయ విమానాశ్రయం నుంచి అర్ధరాత్రి కడపకు బయలుదేరిన ఇండిగో విమానం టేకాఫ్‌కు సిద్ధమవుతున్న సమయంలో ఓ ప్రయాణికుడు అకస్మాత్తుగా అత్యవసర ద్వారం (ఎమర్జెన్సీ డోర్) తెరిచేందుకు ప్రయత్నించినట్లు సమాచారం. దీంతో అప్రమత్తమైన విమాన సిబ్బంది, ఇతర సిబ్బంది వెంటనే అతడిని అడ్డుకుని అదుపులోకి తీసుకున్నారు.
విమానంలో చోటుచేసుకున్న ఈ అనూహ్య పరిణామంతో ప్రయాణికులు తీవ్ర ఆందోళనకు గురయ్యారు. అనంతరం సదరు ప్రయాణికుడిని శంషాబాద్ ఆర్జీఐఏ పోలీసులకు అప్పగించారు. ఈ ఘటనకు గల కారణాలు, ప్రయాణికుడి ప్రవర్తన వెనుక ఉన్న ఉద్దేశాలపై పోలీసులు విచారణ చేపట్టినట్లు సమాచారం.
విమానంలో భద్రతకు సంబంధించిన ఈ ఘటనతో విమానాశ్రయంలో కొద్దిసేపు ఉత్కంఠ నెలకొంది. పూర్తి వివరాలు పోలీసుల విచారణ అనంతరం వెల్లడికానున్నాయి.
_పోతుల నర్సింహా, మేజర్ స్యూస్ : శంషాబాద్
