హైదరాబాద్‌ను 'మోస్ట్ లివబుల్ సిటీ'గా తీర్చిదిద్దుతాం: రూ.52 వేల కోట్ల అభివృద్ధి పనులపై డిప్యూటీ సీఎం భట్టి విక్రమార్క ప్రకటన
హైదరాబాద్, సూర్య ప్రధాన ప్రతినిధి :తెలంగాణ రాజధాని హైదరాబాద్ నగర సమగ్ర ప్రగతికి ప్రణాళికలు సిద్ధం చేశామని, రూ.52,000 కోట్ల అంచనా వ్యయంతో విప్లవాత్మక అభివృద్ధి పనులను వేగవంతం చేస్తున్నామని రాష్ట్ర ఉప ముఖ్యమంత్రి మల్లు భట్టి విక్రమార్క వెల్లడించారు. హైదరాబాద్‌ను ప్రపంచంలోనే అత్యుత్తమ నివాసయోగ్యమైన నగరంగా (Most Livable City) మార్చడమే తమ ప్రజా ప్రభుత్వ ముఖ్య లక్ష్యమని ఆయన స్పష్టం చేశారు. ఇందులో భాగంగా నగరవాసులకు సులభమైన ప్రజా రవాణాను అందుబాటులోకి తెచ్చేందుకు రూ.38,000 కోట్లతో మెట్రో రైల్ ఫేజ్-2 పనులను చేపడుతున్నామని వివరించారు. అలాగే నగరంలో ట్రాఫిక్ సమస్యలకు శాశ్వత పరిష్కారం చూపేందుకు రూ.30,000 కోట్ల అంచనాతో 366 కిలోమీటర్ల మేర రీజినల్ రింగ్ రోడ్ (RRR) నిర్మాణంతో పాటు 21 రేడియల్ రోడ్లను అందుబాటులోకి తెస్తున్నట్లు తెలిపారు.
మరొకవైపు చారిత్రక మూసీ నదికి పూర్వవైభవం తీసుకొచ్చేలా మూసీ పునర్‌ నిర్మాణ పనులను ప్రాధాన్యతా క్రమంలో చేపడుతున్నామని, అంతర్జాతీయ ప్రమాణాలతో ఏకంగా 30,000 ఎకరాల భారీ విస్తీర్ణంలో ప్రతిష్టాత్మక 'ఫ్యూచర్ సిటీ' ని అభివృద్ధి చేస్తున్నామని డిప్యూటీ సీఎం ప్రకటించారు. కాలుష్య రహిత హరిత రవాణాను ప్రోత్సహించడంలో భాగంగా హైదరాబాద్‌లో ఇకపై పూర్తిగా ఎలక్ట్రిక్ బస్సులనే నడిపేలా చర్యలు తీసుకుంటున్నామని, నగరంలోని ఆటోలకు సైతం పర్యావరణహిత 'రెట్రోఫిట్‌మెంట్' విధానాన్ని తీసుకొచ్చామని భట్టి విక్రమార్క పేర్కొన్నారు.
