సల్మాన్ ఖాన్ ప్రస్తావనపై అలిగిన అర్బాజ్ ఖాన్.. ముంబై ఈవెంట్‌లో అసహనం
సూర్య ఎంటర్‌టైన్‌మెంట్ డెస్క్: బాలీవుడ్ నటుడు, నిర్మాత అర్బాజ్ ఖాన్ ముంబైలో జరిగిన ఒక కార్యక్రంలో మీడియాతో మాట్లాడేటప్పుడు ఊహించని పరిణామం ఎదురైంది. సాధారణంగా సినిమా విశేషాలు లేదా ఈవెంట్ వివరాలపై సాగే ముచ్చట్లు, ఆయన సోదరుడు సల్మాన్ ఖాన్‌కు సంబంధించిన ప్రశ్న ఎదురుకావడంతో ఒక్కసారిగా వాతావరణం మారిపోయింది. దీంతో ఆయన ఎలాంటి సమాధానం ఇవ్వకుండానే అక్కడి నుంచి వెళ్లిపోవడం ప్రస్తుతం సినీ వర్గాల్లో మరియు సోషల్ మీడియాలో చర్చనీయాంశంగా మారింది.
ముంబైలోని పవాయ్ లేక్ ప్రాంతంలో జరిగిన ఒక ప్రత్యేక వేడుకకు హాజరైన అర్బాజ్ ఖాన్, అక్కడ మీడియా ప్రతినిధులతో కాసేపు ముచ్చటించారు. ఈ సమయంలో అక్కడున్న ఒక ఫొటోగ్రాఫర్ బిగ్ బాస్ షోలో సల్మాన్ ఖాన్ చేసిన వ్యాఖ్యలు మరియు ట్రోల్స్‌పై ఆయన స్పందన గురించి ప్రశ్నించారు. ఆ ప్రశ్న విన్న వెంటనే అర్బాజ్ ఖాన్ కొద్దిగా అసహనానికి గురయ్యారు. ఏమాత్రం బదులివ్వడానికి ఆసక్తి చూపని ఆయన, ఎక్స్‌క్యూజ్ మీ అంటూ అక్కడి నుంచి తప్పుకుని వేగంగా నడుచుకుంటూ వెళ్ళిపోయారు.
అయితే అంతటితో ఆగకుండా కొద్దిసేపటి తర్వాత మళ్ళీ వెనక్కి తిరిగివచ్చిన అర్బాజ్ ఖాన్ మీడియాను నిలదీశారు. ఆ అడిగిన ప్రశ్న ఇక్కడి ఈవెంట్‌కు గానీ, లేదా ఆభరణాలకు సంబంధించిన విషయానికి గానీ ఏమైనా సంబంధం ఉందా అని సూటిగా ప్రశ్నించారు. కేవలం పబ్లిసిటీ కోసం లేదా సంబంధం లేని విషయాలను ప్రస్తావించడంపై ఆయన తన అసంతృప్తిని స్పష్టంగా వ్యక్తం చేశారు. ప్రస్తుతం ఈ ఘటనకు సంబంధించిన వీడియో నెట్టింట వైరల్ అవుతుండగా, సెలబ్రిటీలు తాము హాజరైన ఈవెంట్స్ వేదికగా ఇతర వ్యక్తిగత విషయాలపై ప్రశ్నించినప్పుడు ఇలాగే స్పందించడం గమనార్హం
