ఎల్‌నినోపై పార హుషార్..అధికారులకు సీఎం హెచ్చరిక
సూర్య తెలంగాణ డెస్క్: రాష్ట్రంలో ఎల్‌నినో ప్రభావం, భవిష్యత్తులో తలెత్తే పరిణామాలపై ముఖ్యమంత్రి రేవంత్ రెడ్డి అత్యున్నత స్థాయి సమీక్ష నిర్వహించి కీలక వ్యాఖ్యలు చేశారు. ఎల్‌నినో కారణంగా రాబోయే రోజుల్లో తీవ్ర సంక్షోభం పొంచి ఉందని ఆయన హెచ్చరించారు. వచ్చే ఏడాది జూన్ వరకు తాగునీరు, సాగునీరు, వ్యవసాయం అలాగే విద్యుత్ రంగానికి సంబంధించి పకడ్బందీగా ప్రత్యేక యాక్షన్ ప్లాన్ సిద్ధం చేయాలని అధికారులను ఆదేశించారు. ఎల్‌నినో ప్రభావాన్ని ఎప్పటికప్పుడు ముందుగానే గుర్తించి యంత్రాంగం మరింత అప్రమత్తంగా ఉండాలని సూచించారు. ఎలాంటి సంక్షోభ పరిస్థితులనైనా సమర్థవంతంగా ఎదుర్కొనేందుకు వీలుగా పక్కా ముందస్తు ప్రణాళికలు రూపొందించుకోవాలని స్పష్టం చేశారు. ముఖ్యంగా భవిష్యత్తులో విద్యుత్ సమస్య తీవ్రతరం అయ్యే ప్రమాదం ఉందని ఆందోళన వ్యక్తం చేసిన సీఎం, ప్రజలకు ఎలాంటి ఇబ్బందులు తలెత్తకుండా విద్యుత్ కొనుగోలుకు ఎంత ఖర్చు చేయడానికైనా రాష్ట్ర ప్రభుత్వం సిద్ధంగా ఉందని వెల్లడించారు. ఈ సమీక్షలో వ్యవసాయ, విద్యుత్, జలవనరుల శాఖల అధికారులు పాల్గొని ప్రస్తుత పరిస్థితులపై సీఎంకు నివేదిక అందించారు. విపత్కర పరిస్థితులను ముందే అంచనా వేసి ప్రజలకు ఇబ్బంది కలగకుండా తగిన చర్యలు చేపట్టాలని ప్రభుత్వం భావిస్తోంది.
