బతుకమ్మ వేడుకల్లో తలసేమియా చిన్నారులు

బతుకమ్మ.. బతుకమ్మ ఉయ్యాలో.. బంగారు బతుకు ఇవ్వమ్మా... ఉయ్యాలో
– బతుకమ్మ వేడుకల్లో తలసేమియా చిన్నారులు

ఖమ్మం, సూర్య (మేజర్ న్యూస్):
బతుకమ్మా.. బతుకమ్మ ఉయ్యాలో.. బంగారు బతుకు ఇవ్వమ్మా.. ఉయ్యాలో అంటూ తలసేమియా చిన్నారులు ఆడిపాడారు. ఆదివారం సంకల్ప స్వచ్ఛంద సేవా సంస్థ ఆధ్వర్యంలో వైరా రోడ్డులోని రితన్య ఆసుపత్రి వద్ద తలసేమియా చిన్నారులు బతుకమ్మ వేడుకల్లో పాల్గొన్నారు. చిన్నారులు, తల్లిదండ్రులు పూలను సేకరించి భారీ బతుకమ్మను తయారు చేశారు. గౌరమ్మ, బతుకమ్మలకు ప్రత్యేక పూజలు చేశారు. ఈ సందర్భంగా చిన్నారులు ఆడిపాడుతూ.. తమకు బతుకునిస్తున్న రక్తదాతలను చల్లంగా చూడమ్మ అంటూ గౌరమ్మను వేడుకున్నారు. ఈ వేడుకల్లో డాక్టర్‌ డి.నారాయణమూర్తి, సంస్థ పౌండర్‌ అనిత, సంస్థ బాధ్యులు ప్రొద్దుటూరి పావని, పి.ఉదయ్‌భాస్కర్, పి.రవిచందర్‌ తదితరులు పాల్గొన్నారు.