అక్టోబర్ 15న చించినాడ బ్రిడ్జిపై రాకపోకలు పూర్తిగా నిలిపివేత..కలెక్టర్ మహేష్ కుమార్.

అమలాపురం మేజర్ న్యూస్ :చించినాడ బ్రిడ్జిపై రహదారి పూర్తి వెడల్పున బిటుమినస్ కాంక్రీట్ బీసీ వేరింగ్ కోర్స్ తుది తారు పొర నిర్మాణ పనులు చేపట్టనున్న నేపథ్యంలో అక్టోబర్ 15వ తేదీ ఉదయం 6 గంటల నుంచి అక్టోబర్ 16వ తేదీ ఉదయం 6 గంటల వరకు 24 గంటల పాటు అన్ని రకాల వాహనాల రాకపోకలను పూర్తిస్థాయిలో నిలిపివేస్తున్నట్లు జిల్లా కలెక్టర్ డా. ఆర్. మహేష్ కుమార్ సోమవారం ఒక ప్రకటనలో తెలిపారు.ఈ సందర్భంగా జిల్లా కలెక్టర్ మాట్లాడుతూ చించినాడ బ్రిడ్జిపై రహదారి నాణ్యత, మన్నికను పెంపొందించడంతో పాటువాహనదారులకు సురక్షితమైన, సౌకర్యవంతమైన ప్రయాణాన్ని అందించేందుకు రహదారి పూర్తి వెడల్పున బిటుమినస్ కాంక్రీట్ (బీసీ) తుది తారు పొర నిర్మాణ పనులు చేపడుతున్నట్లు వివరించారు.
ఈ పనులను నాణ్యతా ప్రమాణాలతో, సకాలంలో పూర్తి చేసేందుకు బ్రిడ్జిపై ఒక రోజు పాటు వాహనాల రాకపోకలను పూర్తిగా నిలిపివేయాల్సిన అవసరం ఉందని తెలిపారు. ఈ సమయంలో భారీ వాహనాలు, కార్లు, ఆటోలు, ద్విచక్ర వాహనాలు సహా ఎటువంటి వాహనాలను బ్రిడ్జిపై అనుమతించబోమని స్పష్టం చేశారు.
జిల్లా ప్రజలు, వాహనదారులు ఈ ట్రాఫిక్ ఆంక్షలను ముందుగానే గమనించి తమ ప్రయాణాలను అందుకు అనుగుణంగా ప్రణాళికాబద్ధంగా ఏర్పాటు చేసుకోవాలని సూచించారు. ప్రయాణికులు అసౌకర్యానికి గురికాకుండా ప్రత్యామ్నాయ మార్గాల ద్వారా రాకపోకలు కొనసాగించాలని కోరారు.ప్రజల ప్రయాణ భద్రత, రహదారి మౌలిక సదుపాయాల మెరుగుదల కోసం చేపడుతున్న ఈ పనులకు ప్రజలు, వాహనదారులు సహకరించాలని జిల్లా కలెక్టర్ డా. ఆర్. మహేష్ కుమార్ విజ్ఞప్తి చేశారు