వారణాసిలో వైభవంగా ఇండియన్ ఎయిర్ ఫోర్స్ విన్యోసాలు

సూర్య జాతీయ డెస్క్: భారతీయ వాయుసేన 94వ వార్షికోత్సవాన్ని పురస్కరించుకుని ఉత్తరప్రదేశ్ లోని పవిత్ర గంగా తీరం వారణాసి వేదికగా నిర్వహించిన వింగ్స్ ఓవర్ గంగెస్ వైమానిక ప్రదర్శన అద్భుతంగా ముగిసింది. నమే ఘాట్ వద్ద ఏర్పాటు చేసిన ఈ అత్యంత ప్రతిష్టాత్మకమైన వైమానిక విన్యోసాలకు ప్రధానమంత్రి నరేంద్ర మోదీ ముఖ్య అతిథిగా హాజరయ్యారు. ఈ కార్యక్రమంలో రక్షణ మంత్రి రాజ్ నాథ్ సింగ్, ఉత్తరప్రదేశ్ గవర్నర్ ఆనందిబెన్ పటేల్ మరియు ముఖ్యమంత్రి యోగి ఆదిత్యనాథ్ తదితర ప్రముఖులు పాల్గొని దేశ రక్షణ సామర్థ్యాలను తిలకించారు.

దేశీయంగా తయారైన తేజస్ తేలికపాటి యుద్ధ విమానాలు, ప్రచండ్ లైట్ కాంబాట్ హెలికాప్టర్లు మరియు సుఖోయ్, రఫేల్ వంటి అత్య్యాధునిక ఫ్రంట్ లైన్ ఫైటర్ జెట్లు గగనతలంలో చేసిన విన్యాసాలు ప్రేక్షకులను ఎంతగానో ఆకట్టుకున్నాయి. అలాగే రవాణా మరియు సహాయక విమానాలతో పాటు సూర్య కిరణ్ ఏరోబాటిక్ బృందం, సారం హెలికాప్టర్ డిస్‌ప్లే టీమ్ ప్రదర్శించిన సమన్వయ విన్యాసాలు వారణాసి గగనతలాన్ని కనువిందు చేశాయి. భారత వాయుసేన సత్తా ఏంటో చాటేలా సాగిన ఈ విన్యోసాలను వీక్షించడానికి స్థానిక ప్రజలు భారీగా తరలివచ్చి ఘన స్వాగతం పలికారు.

ఈ వైమానిక ప్రదర్శనతో పాటు వారణాసిలో అరవింద్ లిమిటెడ్ ఆధ్వర్యంలో ఏర్పాటు చేసిన నూతన దుస్తుల తయారీ పరిశ్రమను ప్రధాని మోదీ ప్రారంభించారు. ఈ కొత్త కేంద్రం ద్వారా ఈ ప్రాంతంలో పారిశ్రామిక అభివృద్ధితో పాటు వందలాది మంది మహిళలకు ఉపాధి అవకాశాలు లభిస్తాయని అంచనా వేస్తున్నారు. మహిళా సాధికారతకు మరియు స్వయం ఉపాధికి పెద్దపీట వేస్తున్న ప్రభుత్వ విధానాల పట్ల స్థానిక మహిళల నుంచి విశేష స్పందన లభించింది. వారణాసి పర్యటనలో భాగంగా ప్రధానికి ఘన స్వాగతం పలికిన మహిళలు, దేశ భద్రతా రంగంలో మరియు అభివృద్ధిలో సాధిస్తున్న విజయాలపై హర్షం వ్యక్తం చేశారు.