వారణాసిలో నూతన దుస్తుల తయారీ యూనిట్‌ను ప్రారంభించిన ప్రధాని నరేంద్ర మోదీ
సూర్య జాతీయ డెస్క్: ఉత్తరప్రదేశ్ లోని పవిత్ర నగరమైన వారణాసిలో పారిశ్రామిక అభివృద్ధికి పెద్దపీట వేస్తూ ప్రధానమంత్రి నరేంద్ర మోదీ అత్యాధునిక వస్త్ర మరియు దుస్తుల తయారీ పరిశ్రమను లాంఛనంగా ప్రారంభించారు. ముఖ్యమంత్రి యోగి ఆదిత్యనాథ్ తో కలిసి ఈ యూనిట్‌ను పరిశీలించిన ప్రధాని, అక్కడ కల్పిస్తున్న సౌకర్యాలు మరియు ఉత్పత్తి తీరుతెన్నులను స్వయంగా తిలకించారు. ఈ సందర్భంగా యూనిట్‌లో తయారైన వివిధ రకాల వస్త్ర ఉత్పత్తుల ప్రదర్శనను కూడా వారు పరిశీలించి, కార్మికులతో ముచ్చటించారు.
ఈ సరికొత్త తయారీ కేంద్రం ఏర్పాటు ద్వారా వారణాసి ప్రాంతంలో టెక్స్‌టైల్ రంగం మరింత బలపడటంతో పాటు స్థానిక ఆర్థిక వ్యవస్థ పుంజుకుంటుందని అధికారిక వర్గాలు వెల్లడించాయి. ముఖ్యంగా ఈ యూనిట్‌లో వందలాది మంది మహిళలకు ఉపాధి అవకాశాలు లభించనుండటం పట్ల స్థానికంగా హర్షాతిరేకాలు వ్యక్తమవుతున్నాయి. మహిళా సాధికారతను ప్రోత్సహించాలనే ప్రభుత్వ లక్ష్యానికి అనుగుణంగా తయారీ రంగంలో వారి భాగస్వామ్యాన్ని పెంచే దిశగా ఈ ప్రాజెక్ట్ అత్యంత కీలక పాత్ర పోషించనుంది.
ఉత్తరప్రదేశ్‌ను పారిశ్రామిక హబ్‌గా తీర్చిదిద్దే ప్రభుత్వ ప్రయత్నాల్లో భాగంగా ఈ దుస్తుల తయారీ యూనిట్ ప్రారంభం ఒక మైలురాయిగా నిలవనుంది. దేశీయ పెట్టుబడులను ఆకర్షించడంతో పాటు జౌళి రంగంలో కొత్త ఉపాధి అవకాశాలను సృష్టించడమే ధ్యేయంగా కేంద్ర రాష్ట్ర ప్రభుత్వాలు సంయుక్తంగా అడుగులు వేస్తున్నాయి. వారణాసి పర్యటనలో భాగంగా ఈ పరిశ్రమను ప్రారంభించిన అనంతరం ప్రధాని మోదీ పలు అభివృద్ధి కార్యక్రమాల్లో పాల్గొని, దేశ రక్షణ రంగానికి సంబంధించిన వైమానిక విన్యోసాల కార్యక్రమంలో ముఖ్య అతిథిగా పాల్గొన్నారు.
