గంగిపల్లిలో ఘనంగా ర్యాలీ.. మానకొండూరు AMC డైరెక్టర్‌గా ముక్కెర సతీష్ ప్రమాణస్వీకారం
సూర్య - మానకొండూర్: మానకొండూరు వ్యవసాయ మార్కెట్ కమిటీ (AMC) డైరెక్టర్‌గా గంగిపల్లి గ్రామానికి చెందిన ముక్కెర సతీష్ ఆదివారం ప్రమాణస్వీకారం చేశారు. కాంగ్రెస్ పార్టీకి క్రమశిక్షణ గల కార్యకర్తగా పేరుపొందిన ఆయన సేవలను గుర్తించి, స్థానిక ఎమ్మెల్యే డాక్టర్ కవ్వంపల్లి సత్యనారాయణ ఈ బాధ్యతలను అప్పగించారు.ఈ సందర్భంగా గంగిపల్లి గ్రామం నుంచి మానకొండూరు వ్యవసాయ మార్కెట్ యార్డు వరకు నిర్వహించిన ద్విచక్ర వాహనాల భారీ ర్యాలీ ఉత్సాహంగా సాగింది. సతీష్‌కు మద్దతుగా కాంగ్రెస్ పార్టీ బ్లాక్ అధ్యక్షుడు తాళ్లపల్లి సంపత్ గౌడ్, పార్టీ సీనియర్ నాయకులు, మడేల్ యూత్ సభ్యులు, రజక సంఘం నాయకులు, రైతులు, మిత్రులు మరియు శ్రేయోభిలాషులు భారీగా తరలివచ్చారు.ఈ సందర్భంగా ముక్కెర సతీష్ మాట్లాడుతూ.. తనపై నమ్మకంతో ఈ పదవిని కల్పించిన ఎమ్మెల్యే డాక్టర్ కవ్వంపల్లి సత్యనారాయణకు ప్రత్యేక ధన్యవాదాలు తెలిపారు. రైతుల సంక్షేమానికి, మార్కెట్ యార్డు అభివృద్ధికి నిరంతరం అందుబాటులో ఉంటూ కృషి చేస్తానని ఆయన ఈ సందర్భంగా పేర్కొన్నారు.
