పెందుర్తిలో 'జన' సునామీ: జనసేన గూటికి రాజయ్యపేట ఎంపీటీసీ అభ్యర్థి ఎర్ర ఈశ్వరరావు!

పెందుర్తి, సూర్య :  పెందుర్తి నియోజకవర్గం పరిధిలోని రాజయ్యపేట ఎంపీటీసీ స్థానానికి స్వతంత్ర అభ్యర్థిగా నామినేషన్ వేసిన ఎర్ర ఈశ్వరరావు తన అనుచరులు, పలు పార్టీల నాయకులతో కలిసి ఆదివారం జనసేన పార్టీలో చేరారు. సుజాతనగర్ లోని క్యాంపు కార్యాలయంలో పెందుర్తి శాసనసభ్యులు పంచకర్ల రమేష్ బాబు సమక్షంలో ఎర్ర ఈశ్వరరావుతో పాటు దాదాపు 100 మంది కార్యకర్తలు జనసేన తీర్థం పుచ్చుకున్నారు. చేరిన ప్రతి ఒక్కరికీ ఎమ్మెల్యే పంచకర్ల రమేష్ బాబు పార్టీ కండువాలు కప్పి సాదరంగా ఆహ్వానించారు. ఈ సందర్భంగా ఎమ్మెల్యే పంచకర్ల రమేష్ బాబు మాట్లాడుతూ.. రాబోయే మండల పరిషత్ ఎన్నికల్లో కూటమి అభ్యర్థులను భారీ మెజారిటీతో గెలిపించాలని కోరారు. పార్టీ పాత, కొత్త నాయకులు మరియు కార్యకర్తలందరూ సమన్వయంతో కలిసికట్టుగా పనిచేయాలని దిశా నిర్దేశం చేశారు. రాజయ్యపేట ఎంపీటీసీ స్థానం పరిధిలోని బొడ్డునాయుడుపాలెం, గోవిందపురం, ముదపాక, బంధవానిపాలెం, రాజయ్యపేట, రాయవరపువానిపాలెం, రాయవరం తదితర పంచాయతీలకు చెందిన పలువురు నాయకులు, కార్యకర్తలు విశేష సంఖ్యలో జనసేనలో చేరిన వారిలో ఉన్నారు. ఈ కార్యక్రమంలో పలువురు జనసేన పార్టీ ముఖ్య నాయకులు, కార్యకర్తలు పాల్గొన్నారు.

రిపోర్టర్ : నారాయణ, పెందుర్తి, విశాఖపట్నం.