ఇస్నాపూర్‌ కూడలిలో ఎనిమిదేళ్ల బాలిక గుర్తింపు
పటాన్‌చెరు: ఇస్నాపూర్‌ కూడలిలో తప్పిపోయిన ఎనిమిదేళ్ల బాలికను పటాన్‌చెరు పోలీసులు గుర్తించి, ఆమెకు సురక్షిత ఆశ్రయం కల్పించేలా చర్యలు చేపట్టారు. బాలిక భద్రత, సంరక్షణ, విద్య, సంక్షేమాన్ని దృష్టిలో ఉంచుకుని సంగారెడ్డిలోని బాల సదనానికి తరలించారు. బాలికకు అవసరమైన సౌకర్యాలు కల్పించి, తగిన సంరక్షణ అందించాలని సంబంధిత అధికారులను కోరారు.అక్టోబర్‌ 24న ఇస్నాపూర్‌ కూడలి వద్ద ఓ బాలిక కనిపించినట్లు గుర్తుతెలియని వ్యక్తి డయల్‌ 112కు సమాచారం అందించారు. వెంటనే స్పందించిన పటాన్‌చెరు పోలీస్‌ స్టేషన్‌ పెట్రోలింగ్‌ సిబ్బంది అక్కడికి చేరుకుని, అంబేడ్కర్‌ విగ్రహం సమీపంలో ఉన్న బాలికను గుర్తించారు. అనంతరం ఆమె వివరాలను సేకరించారు.పోలీసుల వివరాల ప్రకారం.. బాలిక పేరు సోని, తండ్రి నాగయ్య. ఆమె స్వస్థలం సంగారెడ్డి జిల్లా అల్లాదుర్గం మండలం కాగా, ప్రస్తుతం సంగారెడ్డిలో నివసిస్తున్నట్లు వెల్లడించారు.బాలికకు రక్షణ, భద్రత కల్పించేందుకు మహిళా పోలీస్‌ సిబ్బంది ఎస్కార్ట్‌తో ఆమెను సంగారెడ్డి బాల సదనానికి తరలించారు. బాలికకు సురక్షితమైన వాతావరణంలో ఆశ్రయం కల్పించడంతో పాటు, ఆమె అవసరాలకు అనుగుణంగా విద్య, సంక్షేమం, ఇతర సౌకర్యాలు అందించాలని బాల సదనం అధికారులకు పోలీసులు విజ్ఞప్తి చేశారు. నిబంధనల ప్రకారం బాలికకు అవసరమైన రక్షణ, సంరక్షణ అందేలా చర్యలు తీసుకోవాలని కోరారు.
