మున్సిపల్ ఎన్నికల్లో కూటమి అభ్యర్థులను గెలిపించండి: మంత్రి టీజీ భరత్

కర్నూలు: నగర అభివృద్ధి, ప్రజలకు మెరుగైన మౌలిక సదుపాయాల కల్పన కోసం మున్సిపల్ ఎన్నికల్లో కూటమి అభ్యర్థులను భారీ మెజారిటీతో గెలిపించాలని రాష్ట్ర పరిశ్రమలు, వాణిజ్యం, ఆహార శుద్ధి శాఖ మంత్రి టీజీ భరత్ ప్రజలకు విజ్ఞప్తి చేశారు. కర్నూలు నగరంలోని బాపూజీ నగర్ వద్ద ఎన్నికల ప్రచారాన్ని ప్రారంభించిన మంత్రి టీజీ భరత్, 14, 15, 16వ వార్డుల్లో విస్తృతంగా ఎన్నికల ప్రచారం నిర్వహించారు. ఇంటింటికీ వెళ్లి ప్రజలను కలుసుకుని కూటమి అభ్యర్థులకు మద్దతు కోరారు. ఆయా వార్డుల్లో పోటీ చేస్తున్న కార్పొరేటర్ అభ్యర్థుల తరఫున ప్రచారం నిర్వహిస్తూ, సైకిల్ గుర్తు పై ఓటు వేసి గెలిపించాలని ప్రజలను అభ్యర్థించారు.

ఈ సందర్భంగా మంత్రి టీజీ భరత్ మాట్లాడుతూ.. కర్నూలు నగరాన్ని అభివృద్ధి పథంలో ముందుకు తీసుకెళ్లేందుకు కూటమి ప్రభుత్వం కట్టుబడి ఉందన్నారు. ప్రజలకు మెరుగైన రహదారులు, పారిశుద్ధ్య నిర్వహణ, తాగునీటి సదుపాయాలు కల్పించడంతో పాటు నగరంలో అవసరమైన మౌలిక వసతులను మెరుగుపరిచేందుకు ప్రాధాన్యత ఇస్తామని తెలిపారు. ప్రజల సమస్యలను గుర్తించి, వాటి పరిష్కారానికి నిరంతరం కృషి చేస్తామని స్పష్టం చేశారు.

కూటమి ప్రభుత్వం ప్రజలకు ఇచ్చిన హామీలను ఒక్కొక్కటిగా అమలు చేస్తూ అభివృద్ధి, సంక్షేమ కార్యక్రమాలను ముందుకు తీసుకెళ్తోందని మంత్రి పేర్కొన్నారు. నగరంలో అభివృద్ధి పనులు నిరంతరాయంగా కొనసాగాలంటే ప్రజలు కూటమి అభ్యర్థులకు అండగా నిలవాలని కోరారు. ప్రజల అవసరాలకు అనుగుణంగా పనిచేసే అభ్యర్థులను గెలిపించడం ద్వారా వార్డుల అభివృద్ధికి మరింత తోడ్పాటు లభిస్తుందని తెలిపారు. మాటిచ్చిన విధంగా యువతకు ఉద్యోగాల కల్పన కోసం తమ ప్రభుత్వం కృషి చేస్తున్నట్లు చెప్పారు.

14వ వార్డు టీడీపీ కార్పొరేటర్ అభ్యర్థి షేక్ షబ్బీర్, 15వ వార్డు కార్పొరేటర్ అభ్యర్థి మెహబూబ్ ఖాన్, 16వ వార్డు కార్పొరేటర్ అభ్యర్థి చిన్నమ్మలతో పాటు మేయర్ అభ్యర్థి బొల్లెద్దుల విజయ ప్రత్యూషను సైకిల్ గుర్తు పై ఓటు వేసి భారీ మెజారిటీతో గెలిపించాలని మంత్రి టీజీ భరత్ ప్రజలను కోరారు.