రూపాయి పతనాన్ని అడ్డుకునేందుకు ఆర్బీఐ కీలక నిర్ణయం

అమరావతి / ముంబై:అమెరికా డాలర్‌తో రూపాయి మారకం విలువ పడిపోతున్న నేపథ్యంలో భారతీయ రిజర్వ్ బ్యాంక్ (RBI) అప్రమత్తమైంది. రూపాయి విలువ మరింత క్షీణించకుండా అడ్డుకునేందుకు ఆర్బీఐ ఒక కీలక నిర్ణయం తీసుకుంది. ప్రభుత్వ రంగ చమురు (ఆయిల్) కంపెనీల డాలర్ అవసరాలను నేరుగా తీర్చేందుకు ఒక ప్రత్యేక డాలర్ విండోను (Special Dollar Window) ఏర్పాటు చేస్తున్నట్లు ప్రకటించింది. ఈ కొత్త విధానం ఈ నెల 12 నుంచి అమల్లోకి రానుంది.

స్పాట్ మార్కెట్‌లో ఆయిల్ కంపెనీలు డాలర్ల కోసం భారీగా డిమాండ్ సృష్టించడం వల్లే రూపాయి విలువపై తీవ్ర ప్రభావం పడుతోంది. ఈ ప్రత్యేక విండో ద్వారా చమురు కంపెనీలకు నేరుగా డాలర్లు అందించడం ద్వారా, స్పాట్ మార్కెట్‌పై పడే ఒత్తిడిని తగ్గించవచ్చని ఆర్బీఐ ఈ వ్యూహాన్ని అమలు చేస్తోంది. ప్రస్తుతం డాలర్‌తో పోలిస్తే రూపాయి విలువ 96.73 స్థాయికి పడిపోయిన తరుణంలో ఆర్బీఐ తీసుకున్న ఈ నిర్ణయం మార్కెట్‌లో ప్రాధాన్యత సంతరించుకుంది.