పాకిస్థాన్‌కు సైనిక రహస్యాల చేరవేత: వాయుసేన వింగ్ కమాండర్‌పై చార్జిషీట్ దాఖలు చేసిన ఢిల్లీ పోలీసులు
సూర్య నేషనల్ & డిఫెన్స్ డెస్క్: దేశ భద్రతకు సంబంధించిన అత్యంత సున్నితమైన రక్షణ రహస్యాలను పాకిస్థాన్ నిఘా సంస్థ ఏజెంట్‌కు చేరవేశారనే తీవ్ర ఆరోపణలపై అరెస్టయిన భారత వాయుసేన వింగ్ కమాండర్‌పై ఢిల్లీ పోలీసు ప్రత్యేక విభాగం కౌంటర్ ఇంటెలిజెన్స్ ఏజెన్సీ న్యాయస్థానంలో చార్జిషీట్ దాఖలు చేసింది. అధికారిక రహస్యాల చట్టం సహా పలు కఠిన సెక్షన్ల కింద అభియోగాలు మోపుతూ పాటియాలా హౌస్ కోర్టులో ఈ నివేదికను సమర్పించారు.
హనీట్రాప్ వలలో చిక్కుకుని రహస్యాల లీక్:
పోలీసుల చార్జిషీట్ ప్రకారం, సదరు వింగ్ కమాండర్ సోషల్ మీడియా, వాట్సాప్ వేదికగా పాకిస్థాన్‌కు చెందిన ఒక మహిళా గూఢచారి 'హనీట్రాప్' వలలో చిక్కుకున్నారు. గుజరాత్‌లో జారీ అయిన భారతీయ మొబైల్ సిమ్ కార్డును పాకిస్థాన్ నుంచి ఆపరేట్ చేస్తూ సదరు మహిళా ఏజెంట్ ఈ అధికారితో సంప్రదింపులు జరిపింది. ఈ ఏడాది జనవరి 12 నుంచి ఏప్రిల్ 1 మధ్య వీరిద్దరి మధ్య సుమారు 3,008 వాట్సాప్ మెసేజ్‌లు, 65 ఫోటోలు, 42 వాయిస్ కాల్స్ మరియు 4 వీడియో కాల్స్ జరిగినట్లు దర్యాప్తులో తేలింది.
పాక్ ఏజెంట్‌కు చేరవేసిన కీలక సమాచారం ఇదే:
యుద్ధ ప్రణాళికలు & విమానాల మోహరింపు: లేహ్ ఎయిర్‌బేస్‌లో యుద్ధ విమానాల మోహరింపు, ఆ స్థావరం వినియోగం, సూరత్‌గఢ్‌లోని మహాజన్ ఫీల్డ్ ఫైరింగ్ రేంజ్‌లో జరిగిన సైనిక విన్యాసాల వివరాలతో పాటు యుద్ధ ప్రణాళికల పత్రాలను వింగ్ కమాండర్ లీక్ చేసినట్లు చార్జిషీట్‌లో పేర్కొన్నారు.
డ్రోన్ సామర్థ్యాలు & రహస్య విభాగం:వాయుసేనకు చెందిన ఒక రహస్య డ్రోన్ యూనిట్ బలం, దాని నిర్మాణం, డ్రోన్ పరీక్షలు , ఆయుధ వ్యవస్థ సామర్థ్యం మరియు లక్ష్యాలను ఛేదించే టెక్నాలజీ వివరాలను పాక్ ఏజెంట్‌కు అందించారు.
సైనిక స్థావరాల కోఆర్డినేట్స్: కీలకమైన సైనిక స్థావరాల భౌగోళిక కోఆర్డినేట్స్, ఫ్రంట్‌లైన్ యుద్ధ విమానాల కదలికల సమాచారాన్ని కూడా చేరవేసినట్లు పోలీసులు గుర్తించారు.
సహోద్యోగుల ఫోన్లలో స్పైవేర్: పాకిస్థాన్ ఏజెంట్ ఆదేశాల మేరకు, తన కింద పనిచేసే ఐదుగురు సిబ్బంది డిజిటల్ పరికరాల్లో మాల్‌వేర్/స్పైవేర్ ఇన్‌స్టాల్ చేసేందుకు కూడా ఈ అధికారి ప్రయత్నించినట్లు దర్యాప్తు సంస్థ వెల్లడించింది.
గుట్టు రట్టయింది ఇలా:
అత్యంత సున్నితమైన విభాగంలో పనిచేస్తున్న ఈ అధికారి, నిబంధనలకు విరుద్ధంగా తన కార్యాలయంలోకి అనుమతి లేని ఐఫోన్ తీసుకురావడంతో భద్రతా సిబ్బంది తనిఖీలు చేపట్టారు. ఆ ఫోన్‌ను విశ్లేషించగా పాక్ ఏజెంట్‌తో జరిపిన సంభాషణలు, లీక్ చేసిన రహస్య పత్రాలు బయటపడ్డాయి. ప్రస్తుతం తీహార్ జైలులో ఉన్న నిందితుడిపై విచారణ కొనసాగించేందుకు సంబంధిత అధికారుల నుంచి ప్రాసిక్యూషన్ అనుమతి ప్రక్రియను వేగవంతం చేయాలని కోర్టు ఢిల్లీ పోలీసులను ఆదేశించింది.
