ఢిల్లీ పోలీసులపై సీజేపీ వ్యవస్థాపకుడు అభిజీత్ దిప్కే సంచలన ఆరోపణలు

నాగ్‌పుర్/న్యూఢిల్లీ, అక్టోబర్ 11: ‘కాక్‌రోచ్ జనతా పార్టీ’ (సీజేపీ) వ్యవస్థాపకుడు అభిజీత్ దిప్కే ఢిల్లీ పోలీసులపై తీవ్ర ఆరోపణలు చేశారు. కస్టడీలో ఉన్న సమయంలో తన నానమ్మ మరణవార్తను పోలీసులు చెప్పారని, అయితే గ్రామంలో ఉన్న తన కజిన్‌కు ఫోన్ చేసి వివరాలు తెలుసుకునేందుకు, అలాగే న్యాయవాదితో మాట్లాడేందుకు అనుమతించలేదని ఆరోపించారు. అయితే ఈ ఆరోపణలను ఢిల్లీ పోలీసులు ఖండించారు.

దిప్కే ఏమన్నారు?

సీజేపీ నిరసన సందర్భంగా శనివారం అదుపులోకి తీసుకున్న అభిజీత్ దిప్కే.. ఆదివారం విడుదలైన అనంతరం నాగ్‌పుర్‌లో మీడియాతో మాట్లాడారు. తన నానమ్మ మరణించిన విషయం ఢిల్లీ పోలీసులు తనకు తెలియజేశారని చెప్పారు. గ్రామంలో ఉన్న కజిన్‌కు ఫోన్ చేసి పరిస్థితి తెలుసుకునేందుకు రెండు నిమిషాల పాటు ఫోన్ ఇవ్వాలని కోరినా అధికారులు అనుమతించలేదని ఆరోపించారు.

కజిన్ ఫోన్ నంబర్ తనకు గుర్తులేదని చెప్పినా ఫోన్ చేసేందుకు అవకాశం ఇవ్వలేదని తెలిపారు. చట్టప్రకారం న్యాయవాదితో మాట్లాడే హక్కు ఉన్నప్పటికీ, తనకు ఆ అవకాశం కూడా కల్పించలేదని విమర్శించారు.

అరెస్ట్ చేసిన విషయాన్ని రోజంతా తన తల్లిదండ్రులకు తెలియజేయకుండా, తెల్లవారుజామున 3:30 గంటలకు వారికి ఫోన్ చేసి అరెస్ట్ విషయం చెప్పాలని తనపై ఒత్తిడి తెచ్చారని దిప్కే ఆరోపించారు. అనారోగ్యంతో నానమ్మ మరణించడంతో తల్లిదండ్రులు ఇప్పటికే తీవ్ర విషాదంలో ఉన్నారని, అర్ధరాత్రి సమయంలో వారికి ఈ విషయం చెప్పాలని ఒత్తిడి చేయడం అమానవీయమని అన్నారు.

ఢిల్లీ పోలీసులు యూనిఫాంలో ఉన్న గూండాల్లా వ్యవహరిస్తున్నారని దిప్కే తీవ్ర వ్యాఖ్యలు చేశారు. కేంద్ర హోంమంత్రి అమిత్ షా కారణంగానే పోలీసుల తీరు ఇలా మారిందని ఆరోపించారు. తాను ఎలాంటి బాండ్‌పై సంతకం చేయలేదని స్పష్టం చేస్తూ.. మోదీ, అమిత్ షా ప్రభుత్వాల నిరంకుశత్వానికి భయపడేది లేదని, మళ్లీ వీధుల్లోకి వచ్చి పోరాడతామని హెచ్చరించారు.

పోలీసుల వివరణ

దిప్కే ఆరోపణలపై ఢిల్లీ పోలీసు డీసీపీ నేహా యాదవ్ స్పందించారు. నానమ్మ మరణవార్త అందిన వెంటనే అధికారులు దిప్కేను కలిసి విషయం తెలియజేశారని, సాధ్యమైన అన్ని విధాలా సహాయం అందిస్తామని చెప్పారని తెలిపారు.

మానవతా దృక్పథంతో ఆయన ఇంటికి వెళ్లేందుకు ప్రయాణ ఏర్పాట్లు చేస్తామని కూడా పోలీసులు ప్రతిపాదించినట్లు పేర్కొన్నారు. దిప్కేకు మరణవార్త తెలియజేసిన సందర్భానికి సంబంధించిన వీడియోను ఢిల్లీ పోలీసులు విడుదల చేసినట్లు కథనాలు వెల్లడించాయి.

అంత్యక్రియలకు హాజరుకాలేకపోయారని కుటుంబ సభ్యుల ఆరోపణ

దిప్కే పితామహి సావిత్రిబాయి శంకర్‌రావు దిప్కే (85) శనివారం మహారాష్ట్రలోని హింగోలి జిల్లాలో అనారోగ్యంతో మృతి చెందారు.

అభిజీత్‌ను విడుదల చేసి అంత్యక్రియలకు హాజరయ్యేలా చూడాలని ఢిల్లీ పోలీసులను పలుమార్లు కోరినా ఆలస్యంగా విడుదల చేయడంతో ఆయన అంత్యక్రియలకు హాజరుకాలేకపోయారని కుటుంబ సభ్యుడు విలాస్ ఆరోపించారు. అయితే ఈ ఆరోపణను పోలీసులు ఖండించారు. మరణవార్తతో పాటు అంత్యక్రియల సమయం గురించి కూడా అభిజీత్‌కు వెంటనే సమాచారం ఇచ్చామని వారు పేర్కొన్నారు.

కోర్టు నుంచి విడుదల

అభిజీత్ దిప్కే, సౌరవ్ దాస్, ఆశుతోష్ రాంకాలను ఢిల్లీ కంటోన్‌మెంట్ పోలీస్ స్టేషన్‌లో కార్యనిర్వాహక మేజిస్ట్రేట్ ఎదుట హాజరుపరిచారు. అనంతరం వారిని విడుదల చేసినట్లు ఢిల్లీ పోలీసులు తెలిపారు.