బెట్‌ఫెయిర్ (Betfair) సంస్థపై లైఫ్‌టైమ్ లీగల్ పోరాటంలో ఎదురుదెబ్బ
సూర్య అంతర్జాతీయ డెస్క్: ప్రముఖ ఆన్‌లైన్ బెట్టింగ్ మరియు గేమింగ్ సంస్థ 'బెట్‌ఫెయిర్' (Betfair) మాతృ సంస్థపై మృతి చెందిన వ్యక్తి కుటుంబసభ్యులు దాఖలు చేసిన నష్టపరిహార దావాను లండన్ హైకోర్టు తోసిపుచ్చింది. జూదం వ్యసనానికి బానిసై ఆత్మహత్య చేసుకున్న లూక్ ఆష్టన్ (40) కుటుంబం తరఫున దాఖలైన ఈ పిటిషన్‌ను విచారించిన న్యాయస్థానం, బెట్టింగ్ సంస్థలకు కస్టమర్ల పట్ల ప్రత్యేకంగా 'డ్యూటీ ఆఫ్ కేర్' (బాధ్యత) ఉండదని స్పష్టం చేసింది. ఈ చారిత్రాత్మక కేసులో కోర్టు తీర్పు బెట్టింగ్ పరిశ్రమకు ఊరటనిచ్చినప్పటికీ, తీవ్ర చర్చనీయాంశమైంది.
2021 ఏప్రిల్ లో లూక్ ఆష్టన్ అనే వ్యక్తి జూదం కారణంగా భారీగా అప్పులపాలై ఆత్మహత్యకు పాల్పడ్డాడు. బెట్‌ఫెయిర్ సంస్థ నిరంతరం ఉచిత బెట్లు, ఆఫర్లు మరియు వివిధ ప్రేరేపిత అంశాలతో అతడిని జూదం ఆడేలా ప్రోత్సహించిందని, దానివల్ల తీవ్ర మానసిక ఒత్తిడికి గురై అతను ప్రాణాలు కోల్పోయాడని మృతుడి భార్య అన్నీ ఆష్టన్ కోర్టులో వాదించారు. ఈ సంస్థల నిర్లక్ష్యం వల్లే తమ కుటుంబం పెద్ద దిక్కును కోల్పోయిందని ఆరోపిస్తూ కోర్టును ఆశ్రయించారు.
అయితే ఈ వాదనలను కోర్టు తోసిపుచ్చింది. లూక్ ఆష్టన్ కు జూదం వల్ల తీవ్రమైన రుగ్మత ఉందనడానికి లేదా అతని మరణానికి బెట్టింగ్ కంపెనీయే ప్రత్యక్ష కారణమ అనడానికి తగిన ఆధారాలు లేవని హైకోర్టు తేల్చిచెప్పింది. అలాగే కస్టమర్లు జూదంలో నష్టపోకుండా రక్షించాల్సిన చట్టపరమైన బాధ్యత ఆపరేటర్లపై లేదని స్పష్టం చేసింది. ఈ తీర్పుపై మృతుడి కుటుంబసభ్యులు తీవ్ర అసంతృప్తి వ్యక్తం చేయగా, గ్లోబల్ బెట్టింగ్ రంగానికి చెందిన కంపెనీలు మాత్రం దీనిని స్వాగతించాయి.
