మోసపోయిన వారికి అండగా నిలుస్తాం : విక్టిమ్స్ రైట్స్ ప్రొటెక్షన్ ట్రస్ట్

.హిమాయత్ నగర్, మేజర్ న్యూస్ : వివిధ సంస్థల్లో పెట్టుబడులు పెట్టి మోసానికి గురైన బాధితులకు విక్టిమ్స్ రైట్స్ ప్రొటెక్షన్ ట్రస్ట్ అండగా నిలుస్తుందని కన్వీనర్ గిరి ప్రసాద్ శర్మ పేర్కొన్నారు. ఈమెరకు ఆయన శనివారం బషీర్బాగ్ ప్రెస్ క్లబ్ లో మీడియాతో మాట్లాడారు. పెట్టుబడుల ఆశ చూపి మోసం చేసిన సంస్థల అంతు చూసేందుకు తమ సంస్థను ఏర్పాటు చేశామన్నారు. ధన్వంతరి, అక్షర చిట్ ఫండ్ వంటి సంస్థల కారణంగా మోసపోయిన బాధితులకు నేటికీ న్యాయం జరగలేదన్నారు. చట్టంలో  లోసుగులను ఆసరాగా చేసుకుని ఆ సంస్థల యాజమాన్యాలు తప్పించుకు తిరుగుతున్నాయని సూచించారు. బాధితులకు న్యాయం చేయాల్సిన సంస్థలు ఉద్యోగుల లేమితో మోసగాళ్లను చట్టం ముందు దోషులుగా నిలబెట్టడంలో విఫలమవుతున్నారని చెప్పారు. స్పెషల్ ఇన్వెస్టిగేషన్ టీం ( సిట్), క్రిమినల్ ఇన్వెస్టిగేషన్ డిపార్ట్మెంట్ (సిఐడి) సెంట్రల్ క్రైమ్ స్టేషన్( సి సి ఎస్) ఎన్ఫోర్స్మెంట్ డైరెక్టర్ (ఈడి )విభాగాలను కలిపి ఒక్కటిగా చేయాలని కోరారు. దీని ద్వారా సిబ్బంది కొరత తీరటం తో పాటు, బాధితులకు సత్వర న్యాయం జరుగుతుందని తెలిపారు. నేరాలపై తక్షణ చర్యలు తీసుకోకుంటే వాటి సంఖ్య పెరిగే అవకాశాలు రాష్ట్రంలో ఎక్కువగా ఉంటాయన్నారు.  మోసం చేసిన సంస్థల ఆస్తులు, నల్లధనాన్ని వెంటనే జప్తు చేసి బాధితులకు పంచాలని సూచించారు. దీనిని రాష్ట్ర డిజిపి సీవీ ఆనంద్, నూతన సిపి డాక్టర్ మహేష్ భగవత్ పరిగణలోకి తీసుకోవాలని ఆయన విజ్ఞప్తి చేశారు.