సూర్య కరీంనగర్ : నగరంలోని సెయింట్ ఆల్ఫోన్స్ ఉన్నత పాఠశాలలో మూడు రోజులుగా నిర్వహించిన 70వ రాష్ట్రస్థాయి ఎస్‌జీఎఫ్ అండర్‌-17 బాలబాలికల బాస్కెట్‌బాల్ పోటీలు ఆదివారం ముగిశాయి. బాలుర విభాగంలో రంగారెడ్డి, బాలికల విభాగంలో మెదక్ జట్లు ఛాంపియన్లుగా నిలిచాయి. బాలుర విభాగంలో హైదరాబాద్ రన్నరప్, నిజామాబాద్ తృతీయ స్థానంలో నిలవగా, బాలికల విభాగంలో నిజామాబాద్ రన్నరప్, హైదరాబాద్ తృతీయ స్థానాన్ని సాధించాయి. ముగింపు కార్యక్రమంలో డీఈఓ తిరుపతిరావు విజేతలకు ట్రోఫీలు, పతకాలు, ప్రశంసాపత్రాలు అందజేశారు. ఈ సందర్భంగా ఆయన మాట్లాడుతూ క్రీడలు ఆత్మవిశ్వాసం, క్రమశిక్షణను పెంపొందిస్తాయని అన్నారు. పాఠశాల ప్రధానోపాధ్యాయుడు సంతోష్ రెడ్డి క్రీడల ప్రాధాన్యతను వివరించారు. జిల్లా ఎస్‌జీఎఫ్ కార్యదర్శి క్రీడా నివేదిక సమర్పించారు. రాష్ట్రస్థాయి పరిశీలకులు రమేష్, సునీత, బాబు శ్రీనివాస్, ఆడెపు శ్రీనివాస్, అంతటి శంకరయ్య, డి.సత్యానంద్, సునీల్, అనిల్, శ్రీధర్ రావు, ఎల్.బన్సీలాల్, జీవన్ భార్గవ్, సుమారు 80 మంది వ్యాయామ ఉపాధ్యాయులు పాల్గొన్నారు. జాతీయస్థాయి పోటీల కోసం బాలబాలికల విభాగాల్లో 15 మంది చొప్పున క్రీడాకారులను రాష్ట్ర జట్లకు ఎంపిక చేశారు.
