ఈజిప్ట్‌లో గ్యాస్ ఇందన ప్రారంభించిన షెల్
సూర్య బిజినెస్ డెస్క్: అంతర్జాతీయ ఇంధన దిగ్గజం షెల్ (Shell) ఈజిప్ట్‌లోని మధ్యధరా సముద్ర తీరంలో ఉన్న ప్రతిష్టాత్మకమైన మినా వెస్ట్ గ్యాస్ క్షేత్రం నుండి అధికారికంగా ఉత్పత్తిని ప్రారంభించినట్లు వెల్లడించింది. ఈజిప్ట్ దేశీయ ఇంధన అవసరాలను తీర్చడంలో ఈ కొత్త గ్యాస్ క్షేత్రం అత్యంత కీలకమైన పాత్ర పోషించనుందని కంపెనీ వర్గాలు తెలిపాయి. గతంలో చేసిన చమురు, గ్యాస్ అన్వేషణ ఫలితంగా ఈ క్షేత్రాన్ని అభివృద్ధి చేసిన షెల్ సంస్థ, నిర్ణీత కాలంలోనే ఉత్పత్తిని ప్రారంభించి సరికొత్త మైలురాయిని సాధించింది.
మినా వెస్ట్ క్షేత్రం నుండి రోజువారీగా సుమారు 160 మిలియన్ ఘనపు అడుగుల సహజ వాయువును ఉత్పత్తి చేసే సామర్థ్యం ఉందని షెల్ అంచనా వేస్తోంది. ఈ ప్రాజెక్ట్‌ను ఇప్పటికే ఉన్న వెస్ట్ డెల్టా డీప్ మెరైన్ (WDDM) మౌలిక సదుపాయాలకు అనుసంధానించడం ద్వారా పనులను వేగంగా పూర్తి చేసినట్లు కంపెనీ వెల్లడించింది. ఈ క్షేత్రంలో ఆపరేటర్‌గా వ్యవహరిస్తున్న షెల్ సంస్థకు 60 శాతం వాటా ఉండగా, కువైట్ ఫారిన్ పెట్రోలియం ఎక్స్పొరేషన్ కార్పొరేషన్ (KUFPEC) అనుబంధ సంస్థకు మిగిలిన 40 శాతం వాటా ఉంది.
ఈజిప్ట్ దేశం ఎదుర్కొంటున్న ఇంధన కొరతను అధిగమించడానికి మరియు దేశీయ గ్యాస్ ఉత్పత్తిని పెంచడానికి ఈ ప్రాజెక్ట్ ఎంతగానో దోహదపడుతుందని ఆర్థిక నిపుణులు అభిప్రాయపడుతున్నారు. ప్రభుత్వ రంగ సంస్థలతో కలిసి సకాలంలో చేపట్టిన ఈ చర్యల వల్ల ఇంధన దిగుమతులపై భారం తగ్గే అవకాశం ఉందని విశ్లేషకులు భావిస్తున్నారు. అంతర్జాతీయ ఇంధన మార్కెట్‌లో సరఫరా గొలుసును మరింత పటిష్టం చేసే దిశగా షెల్ తీసుకున్న ఈ నిర్ణయం మంచి ఫలితాలను ఇస్తోందని మార్కెట్ వర్గాలు కొనియాడుతున్నాయి.
