తెల్లకాగితం ట్రైలర్: టీనేజ్ లవ్ స్టోరీతో అలరిస్తున్న హర్ష్ రోషన్.. గాంధీ జయంతికి విడుదల!

సూర్య ఎంటర్‌టైన్‌మెంట్ డెస్క్: 'కోర్ట్' ఫేమ్ హర్ష్ రోషన్ హీరోగా, నక్షత్ర కథానాయికగా తెరకెక్కుతున్న లేటెస్ట్ యూత్‌ఫుల్ లవ్ ఎంటర్‌టైనర్ 'తెల్లకాగితం'. రమేష్ బండ్రెడ్డి దర్శకత్వంలో అరుణాచల క్రియేషన్స్ బ్యానర్‌పై కృష్ణ కొమ్మాలపాటి నిర్మిస్తున్న ఈ చిత్రం ట్రైలర్‌ను మేకర్స్ తాజాగా విడుదల చేశారు. ఇప్పటికే విడుదలైన టీజర్‌కు విశేష ఆదరణ లభించగా, ఇప్పుడు విడుదలైన ట్రైలర్ సినిమాపై మరింత ఆసక్తిని పెంచుతోంది.

ఒక స్వచ్ఛమైన టీనేజ్ ప్రేమకథ ఆధారంగా ఈ సినిమాను తెరకెక్కించినట్లు ట్రైలర్ చూస్తే అర్థమవుతోంది. స్కూల్ రోజుల్లో మొదలైన ప్రేమ కథ చివరికి ఎలాంటి మలుపులు తిరిగింది, తెలిసి తెలియని చిన్న వయసులో ప్రేమలో పడి చేసే ఒక్క చిన్న తప్పు తెల్లకాగితం లాంటి జీవితాన్ని ఎలా మార్చేస్తుందనే ఆసక్తికరమైన కోణంలో దర్శకుడు ఈ చిత్రాన్ని ఆవిష్కరించారు. "ఒక్క చిన్న తప్పు.. తెల్లటి కాగితం లాంటి మీ జీవితాన్ని నాశనం చేస్తుంది" అనే డైలాగ్ కథాంశం యొక్క గాఢతను చాటిచెబుతోంది.  

విజయ్ బుల్గానిన్ అందించిన మధురమైన నేపథ్య సంగీతం ట్రైలర్‌కు ప్రాణం పోసింది. యౌవనంలో ఎదురయ్యే భావోద్వేగాలు, ప్రేమికుల ప్రయాణాన్ని హృద్యంగా ఆవిష్కరించిన ఈ చిత్రాన్ని గాంధీ జయంతి కానుకగా అక్టోబర్ 2న ప్రపంచవ్యాప్తంగా థియేటర్లలో విడుదల చేసేందుకు నిర్మాతలు సన్నాహాలు చేస్తున్నారు.