నాని కష్టానికి నేనే సాక్ష్యం.. ‘ది ప్యారడైజ్’ రిలీజ్ వేళ భార్య అంజన ఎమోషనల్ పోస్ట్!
సూర్య ఎంటర్టైన్మెంట్ డెస్క్: టాలీవుడ్ నేచురల్ స్టార్ నాని హీరోగా నటించిన తాజా సంచలన చిత్రం ‘ది ప్యారడైజ్’ ప్రపంచవ్యాప్తంగా విడుదలకు సిద్ధమైన తరుణంలో, ఆయన సతీమణి అంజనా యలవర్తి సోషల్ మీడియా వేదికగా పంచుకున్న ఒక భావోద్వేగభరితమైన పోస్ట్ ప్రస్తుతం సినీ వర్గాల్లో తీవ్ర చర్చనీయాంశంగా మారింది. ఎలాంటి సినీ నేపథ్యం లేకుండా పరిశ్రమలోకి అడుగుపెట్టి, తన ప్రతిభతో అంచలంచలుగా ఎదిగిన నాని ప్రయాణాన్ని గుర్తుచేసుకుంటూ ఆమె చేసిన వ్యాఖ్యలు అభిమానులను ఎంతగానో ఆకట్టుకుంటున్నాయి.
భర్త సినీ ప్రయాణం గురించి మాట్లాడిన అంజన, గతంలో నాని ఎదుర్కొన్న తొలి నాళ్ల కష్టాలను ఓపెన్గా పంచుకున్నారు. తాము కాలేజీ రోజుల్లో నాని సినిమా చూసేందుకు వెళితే, రిలీజ్ రోజున కనీసం మార్నింగ్ షో కూడా పడని పరిస్థితులను అప్పట్లో చూశానని ఆమె గుర్తుచేసుకున్నారు. ఒక కొత్త హీరో తన సినిమాను సరైన సమయంలో థియేటర్లకు తీసుకురావడం ఎంతటి ప్రయాసతో కూడుకున్నదో అప్పుడు అర్థమైందని పేర్కొన్నారు. కానీ దాదాపు దశాబ్ద కాలానికి పైగా సాగిన ఈ సుదీర్ఘ ప్రయాణంలో నాని ఒక్కో సినిమాతో ప్రేక్షకుల నమ్మకాన్ని సంపాదించుకుంటూ ఇవాళ ఈ స్థాయికి చేరుకోవడం చూస్తుంటే ఎంతో గర్వంగా ఉందని ఆమె తెలిపారు.
నాని ప్రతి చిత్రాన్ని తన సొంత బిడ్డలా ప్రేమిస్తారని, కొన్ని సినిమాలు నడిచాయని, మరికొన్ని పరిగెత్తాయని, ఇంకొన్ని దారిలో ఎదురుదెబ్బలు తిన్నాయని అంజన రాసుకొచ్చారు. ఫలితాలతో సంబంధం లేకుండా ప్రతి ప్రాజెక్ట్ పట్ల ఆయన చూపించే అంకితభావం గొప్పదని కొనియాడారు. ఇప్పుడు ‘ది ప్యారడైజ్’ సినిమాతో మరో పెద్ద విజయానికి సిద్ధమవుతున్న తరుణంలో కుటుంబం అంతా ఆయన వెంటే ఉంటుందని భరోసా ఇస్తూ ఆమె చేసిన ఈ పోస్ట్ నెట్టింట వైరల్గా మారింది. శ్రీకాంత్ ఓదెల దర్శకత్వంలో తెరకెక్కిన ఈ చిత్రంపై ఇప్పటికే భారీ అంచనాలు నెలకొని ఉండగా, భార్య అందించిన ఈ ఎమోషనల్ బూస్ట్ నాని అభిమానుల్లో మరింత జోష్ నింపుతోంది.
