చకోర సినిమా చాలా బాగుంది.. ట్రైలర్ లాంచ్ ఈవెంట్లో హీరో ఆకాష్ జగన్నాథ్ ప్రశంసలు
సూర్య ఎంటర్టైన్మెంట్ డెస్క్: శ్రవణ్, మలైకా టి. వాసుపల్ జంటగా నటిస్తున్న తాజా రొమాంటిక్ ఎంటర్టైనర్ చకోర లూనార్ లవ్ బర్డ్ చిత్రంపై టాలీవుడ్లో ఆసక్తి నెలకొంది. మంగా శ్రీనివాస్ రచన మరియు దర్శకత్వంలో తెరకెక్కుతున్న ఈ సినిమా ట్రైలర్ లాంచ్ కార్యక్రమం ఘనంగా జరగగా, ఈ వేడుకకు యువ హీరో ఆకాష్ జగన్నాథ్ ముఖ్య అతిథిగా హాజరై ట్రైలర్ను విడుదల చేశారు. ఈ సందర్భంగా సినిమాను తాను చూశానని, శ్రవణ్ మరియు మలైక నటన ఈ పాత్రలకు నూటికి నూరుపాట్లు సరిపోయేలా ఉందని ఆయన ప్రశంసించారు. కొత్తవారితో కూడిన ఈ యంగ్ టీమ్తో సినిమాను నిర్మించిన డాక్టర్ చింతాడ హేమారావును ఆకాష్ అభినందించడమే కాకుండా ఈ చిత్రం పెద్ద విజయం సాధించాలని ఆకాంక్షించారు.
పెద్ద హీరోలను సంప్రదించి సినిమా చేయడం అంత తేలికైన విషయం కాదని, అందుకే కొత్త నటీనటులైన శ్రవణ్, మలైకాలను ఈ చిత్రం ద్వారా పరిచయం చేస్తున్నట్లు దర్శకుడు మంగా శ్రీనివాస్ తెలిపారు. తన ఊహకు, విజన్కు తగ్గట్టుగా నటీనటులు ఎంతో సహజంగా నటించారని ఆయన పేర్కొన్నారు. తమ సినిమా పూర్తి స్థాయి కుటుంబ ప్రేక్షకులను, యువతను ఆకట్టుకునేలా ఉంటుందని, థియేటర్కు వచ్చిన ప్రతి ఒక్కరికీ మంచి అనుభూతి కలుగుతుందని హీరో శ్రవణ్ ధీమా వ్యక్తం చేశారు. తెలుగు తెరపై ఇప్పటివరకు ఎప్పుడూ చూడని ఒక వినూత్నమైన ప్రేమకథా చిత్రంగా ఇది నిలుస్తుందని నిర్మాత చింతాడ హేమారావుతో పాటు డిస్ట్రిబ్యూటర్ బాపిరాజు వెల్లడించారు.
శ్రీ లక్ష్మి పిక్చర్స్ బ్యానర్పై రాబోతున్న ఈ సినిమా అక్టోబర్ 9న ప్రపంచవ్యాప్తంగా థియేటర్లలో విడుదల కానుంది. రుప్ప గోపీకృష్ణ సినిమాటోగ్రఫీ అందిస్తుండగా, ప్రిన్స్ హెన్రీ ఈ చిత్రానికి సంగీతం సమకూరుస్తున్నారు. ట్రైలర్ లాంచ్ ఈవెంట్ ద్వారా వచ్చిన పాజిటివ్ బజ్ సినిమాపై అంచనాలను మరింత పెంచేసింది. వైవిధ్యమైన లవ్ స్టోరీతో రాబోతున్న ఈ చిత్రం బాక్సాఫీస్ వద్ద ఎలాంటి విజయాన్ని అందుకుంటుందనేది చూడాలి. త్వరలోనే చిత్ర యూనిట్ ప్రమోషన్ కార్యక్రమాలను మరింత జోరుగా నిర్వహించేందుకు సన్నాహాలు చేస్తోంది.
