'ఇట్లు అర్జున' ఈవెంట్లో వింత ప్రశ్న.. అనస్వర రాజన్ క్యూట్ రియాక్షన్ వైరల్!
సూర్య ఎంటర్టైన్మెంట్ డెస్క్: సాయి అనీష్, అనస్వర రాజన్ జంటగా నటిస్తున్న రాబోయే చిత్రం 'ఇట్లు అర్జున'. మహేష్ ఉప్పల దర్శకత్వంలో తెరకెక్కుతున్న ఈ చిత్రాన్ని ప్రముఖ దర్శకుడు వెంకీ కుడుముల నిర్మిస్తున్నారు. ఇప్పటికే Shooting పూర్తి చేసుకున్న ఈ సినిమా అక్టోబరు 30న ప్రేక్షకుల ముందుకు రావడానికి సిద్ధమవుతోంది. ఈ క్రమంలో తాజాగా మేకర్స్ ఈ సినిమా టీజర్ను విడుదల చేసి, ప్రెస్ మీట్ నిర్వహించారు. అయితే ఈ మీడియా సమావేశంలో హీరోయిన్ అనస్వర రాజన్కు ఎదురైన ఓ వింత ప్రశ్న, దానికి ఆమె ఇచ్చిన రియాక్షన్ ఇప్పుడు నెటిజన్లను విపరీతంగా ఆకట్టుకుంటోంది.
ప్రెస్ మీట్ జరుగుతున్న సమయంలో ఓ విలేకరి స్పందిస్తూ, 'యాక్టర్ గా మీ హిస్ట్రియానిక్స్ (నటన, హావాభావాలు)పై మీరేలా కామెంట్ చేస్తారు?' అని అనస్వరను ప్రశ్నించారు. ఈ విచిత్రమైన ప్రశ్న వినగానే అనస్వర రాజన్ ఒక్కసారిగా ఆశ్చర్యపోయి, నవ్వులు చిందించింది. పక్కనే ఉన్న హీరో సాయి అనీష్ కూడా ఆ ప్రశ్న అర్థం కాక చిరునవ్వులు చిందించడంతో వేదిక వద్ద సరదా వాతావరణం నెలకొంది. ఆమె క్యూట్ రియాక్షన్కు అక్కడ ఉన్న విలేకరులు, ప్రేక్షకులు చప్పట్లతో మద్దతు తెలిపారు.
ఈ వేడుకకు సంబంధించిన వీడియో సోషల్ మీడియాలో విపరీతంగా వైరల్ కావడంతో నెటిజన్లు అనస్వర సహజమైన ప్రవర్తనను ఎంతగానో మెచ్చుకుంటున్నారు. అడిగిన ప్రశ్నకు చిరునవ్వుతోనే చక్కటి సమాధానం చెప్పిందంటూ కామెంట్లు పెడుతున్నారు. కాగా, 'సూపర్ శరణ్య' చిత్రంతో తెలుగు ప్రేక్షకులకు దగ్గరైన ఈ మలయాళ భామ, 'ఇట్లు అర్జున'తో పాటు మెగాస్టార్ చిరంజీవి నటిస్తున్న 'కాకా' సినిమాలో ఆయన కుమార్తెగా నటిస్తూ వరుస క్రేజీ ప్రాజెక్టులతో దూసుకుపోతోంది.
