‘కాకా’లో అమ్ములు పాపగా అనస్వర రాజన్.. మెగాస్టార్ నీడలో క్యూట్ అండ్ ఇంటెన్స్ లుక్!
మెగాస్టార్ చిరంజీవి, సక్సెస్ ఫుల్ డైరెక్టర్ బాబీ కొల్లి కాంబినేషన్లో తెరకెక్కుతున్న హై-ఇంటెన్సిటీ యాక్షన్ ఎంటర్టైనర్ ‘కాకా’పై టాలీవుడ్లో అంచనాలు తారాస్థాయికి చేరాయి. కేవీఎన్ ప్రొడక్షన్స్ బ్యానర్పై వెంకట్ కే నారాయణ అత్యంత భారీ బడ్జెట్తో నిర్మిస్తున్న ఈ చిత్రంలో చిరంజీవిని సరికొత్త కోణంలో చూపించబోతున్నారు. ఇప్పటికే విడుదలైన టైటిల్ గ్లింప్స్ సినిమాపై మాస్ ప్రేక్షకుల్లో విపరీతమైన క్రేజ్ క్రియేట్ చేయగా, తాజాగా ఈ చిత్రంలో కీలక పాత్ర పోషిస్తున్న టాలెంటెడ్ నటి అనస్వర రాజన్ పుట్టినరోజు సందర్భంగా మేకర్స్ ఆమె ఫస్ట్ లుక్ పోస్టర్ను విడుదల చేశారు.
ఈ పోస్టర్లో అనస్వరను ‘హార్ట్ ఆఫ్ కాకా’గా అభివర్ణిస్తూ, ‘అమ్ములు పాప’ పాత్రను పరిచయం చేశారు. చేతిలో పుస్తకాలు, తెల్లని కోట్, స్టెతస్కోప్, భుజానికి బ్యాక్ప్యాక్తో ఒక మెడికల్ కాలేజ్ స్టూడెంట్గా ఆమె చాలా సింపుల్గా, అమాయకంగా కనిపిస్తోంది. అయితే ఈ పోస్టర్లోని అసలు ట్విస్ట్ ఆమె వెనుక ఉన్న నీడలో దాగుంది. గోడపై మెగాస్టార్ చిరంజీవి సిల్హౌట్ కనిపిస్తుండటం, ఆ అమ్మాయిని రక్షించడానికి ‘సత్యం’ పాత్ర నీడలా కాపలా ఉందనే హింట్ను ఈ పోస్టర్ బలంగా ఇస్తోంది. సాఫ్ట్ అండ్ చీర్ఫుల్ అప్పియరెన్స్కు, యాక్షన్ ఇంటెన్సిటీకి మధ్య ఉన్న ఈ కాంట్రాస్ట్ సినిమాపై అంచనాలను మరింత పెంచేస్తోంది.
ప్రస్తుతం శరవేగంగా షూటింగ్ జరుపుకుంటున్న ఈ చిత్రానికి ఎస్. థమన్ సంగీతం అందిస్తుండగా, విజయ్ కార్తీక్ కన్నన్ సినిమాటోగ్రఫీ, అవినాష్ కొల్లా ప్రొడక్షన్ డిజైన్ బాధ్యతలు నిర్వహిస్తున్నారు. కోన వెంకట్, కే చక్రవర్తి రెడ్డి స్క్రీన్ప్లే అందిస్తున్న ఈ భారీ ప్రాజెక్ట్ను 2027 జనవరి 13న సంక్రాంతి కానుకగా గ్రాండ్గా థియేటర్లలో విడుదల చేసేందుకు సన్నాహాలు చేస్తున్నారు.
