గోద్రేజ్ కన్స్యూమర్‌కు 25% అప్‌సైడ్: బ్రోకరేజ్ సవరించిన టార్గెట్ ధరలు
సూర్య బిజినెస్ బ్యూరో, ముంబై: ప్రస్తుత ఆర్థిక సంవత్సరం రెండవ త్రైమాసికం (Q2) ఫలితాల వెల్లడి అనంతరం దేశీయ ప్రముఖ బ్రోకరేజ్ సంస్థ మోతీలాల్ ఓస్వాల్ ఫైనాన్షియల్ సర్వీసెస్ (MOFSL) కీలక రంగాలకు చెందిన ప్రధాన కంపెనీల పనితీరుపై సమగ్ర సమీక్షా నివేదికను విడుదల చేసింది. ఎనర్జీ రంగ దిగ్గజం కోల్ ఇండియా , ప్రముఖ మద్యం తయారీ సంస్థ యునైటెడ్ స్పిరిట్స్ , ఎఫ్‌ఎమ్‌సీజీ దిగ్గజం గోద్రేజ్ కన్స్యూమర్ ప్రొడక్ట్స్స్టాక్స్‌కు సంబంధించిన ఆర్థిక అంచనాలను విశ్లేషిస్తూ సవరించిన లక్ష్య ధరలను మరియు సంభావ్య వృద్ధిని వెల్లడించింది.
బ్రోకరేజ్ నివేదిక ప్రకారం, ప్రస్తుత మార్కెట్ ధరలతో పోలిస్తే గోద్రేజ్ కన్స్యూమర్ ప్రొడక్ట్స్ అత్యధికంగా దాదాపు 25 శాతం వరకు వృద్ధిని కనబరిచే అవకాశముంది. కంపెనీ ఏకీకృత ఆదాయ వృద్ధి నిలకడగా ఉండటం, ఇండోనేషియాతో పాటు అంతర్జాతీయ మార్కెట్లలో నమోదైన డిమాండ్ సంస్థకు కలిసివస్తోందని విశ్లేషించింది. ముడిసరుకు వ్యయాల ఒత్తిడి స్వల్పకాలికంగా ఉన్నప్పటికీ, ధరల సర్దుబాటు మరియు ఖర్చుల నియంత్రణ ద్వారా రాబోయే త్రైమాసికాల్లో మార్జిన్లు విస్తరిస్తాయని పేర్కొంటూ కొనుగోలు సిఫార్సును కొనసాగించింది.
మైనింగ్ దిగ్గజం కోల్ ఇండియా స్టాక్‌పై మోతీలాల్ ఓస్వాల్ సుమారు 14 శాతం మేర అప్‌సైడ్ పొటెన్షియల్ ఉందని అంచనా వేసింది. దేశీయ విద్యుత్ కేంద్రాల నుంచి బొగ్గుకు స్థిరమైన డిమాండ్ కొనసాగుతుండటం, ఉత్పత్తి సామర్థ్యం మరియు ఇ-వేలం ప్రీమియంలు కంపెనీ నగదు ప్రవాహానికి దన్నుగా నిలుస్తున్నాయని తెలిపింది. మరోవైపు, ప్రీమియం విభాగంపై ప్రధానంగా దృష్టి సారించిన యునైటెడ్ స్పిరిట్స్ షేరుపై మోతీలాల్ ఓస్వాల్ సుమారు 7 శాతం మేర వృద్ధిని అంచనా వేస్తూ రేటింగ్‌లను కొనసాగించింది.
