విదేశీ బ్రాండ్లతో పాటు గొళం విప్పుతున్న దేశీయ మద్యం దిగ్గజాలు
సూర్య బిజినెస్ డెస్క్: అంతర్జాతీయంగా అత్యంత ఆదరణ పొందిన స్కాచ్ విస్కీ దిగుమతి సుంకాలు మరియు ట్రేడ్‌మార్క్ నిబంధనల వివాదంపై కేంద్ర ప్రభుత్వం అత్యంత కీలకమైన సమావేశానికి రంగం సిద్ధం చేసింది. భారత్‌లో విక్రయించే స్కాచ్ విస్కీ నాణ్యత, లేబులింగ్ మరియు దిగుమతి సుంకాలకు సంబంధించిన అంశాలపై విదేశీ మద్యం తయారీదారులతో పాటు దేశీయ దిగ్గజ మద్యం కంపెనీల ప్రతినిధులతో కేంద్ర వాణిజ్య మంత్రిత్వ శాఖ చర్చలు జరపనుంది. దశాబ్దాలుగా నలుగుతున్న ఈ వివాదానికి శాశ్వత పరిష్కారం కనుగొనే దిశగా ప్రభుత్వం అడుగులు వేస్తుండటంతో బిజినెస్ వర్గాల్లో తీవ్ర ఆసక్తి నెలకొంది.
స్కాచ్ విస్కీ తయారీకి సంబంధించి అంతర్జాతీయంగా ఉన్న భౌగోళిక గుర్తింపు నిబంధనలను భారత్‌లోనూ కచ్చితంగా అమలు చేయాలని యూకేకి చెందిన విదేశీ కంపెనీలు గట్టిగా కోరుతున్నాయి. అయితే ఇదే సమయంలో దేశీయ మార్కెట్లో తమ ఉత్పత్తులను రక్షించుకోవడానికి, నాణ్యతా ప్రమాణాలలో సమతుల్యత సాధించడానికి దేశీయ మద్యం దిగ్గజాలు కూడా తమ వాదనను గట్టిగా వినిపిస్తున్నాయి. విదేశీ బ్రాండ్ల ఒత్తిడికి తలగ్గకుండా దేశీయ పరిశ్రమల ప్రయోజనాలను కూడా కాపాడాలని స్థానిక తయారీదారులు ప్రభుత్వాన్ని కోరుతున్నారు. ఈ నేపథ్యంలో విదేశీ, స్వదేశీ కంపెనీలను ఒకే వేదికపైకి తెచ్చి చర్చలు జరపడం ద్వారా మార్కెట్లో నెలకొన్న ప్రతిష్టంభనకు తెరదించాలని కేంద్రం భావిస్తోంది.
భారతదేశంలో మద్యం వినియోగం నిలకడగా పెరుగుతుండటంతో గ్లోబల్ లిక్కర్ బ్రాండ్లు మన దేశ మార్కెట్‌పై ప్రత్యేక దృష్టి సారించాయి. రాబోయే రోజుల్లో స్వేచ్ఛా వాణిజ్య ఒప్పందాల నేపథ్యంలో దిగుమతి సుంకాలు మరింత తగ్గే అవకాశం ఉన్నందున, స్థానిక మరియు విదేశీ కంపెనీల మధ్య పోటీ మరింత తీవ్రమయ్యే సూచనలు కనిపిస్తున్నాయి. ఈ సమావేశంలో తీసుకునే నిర్ణయాలు రాబోయే రోజుల్లో భారతీయ మద్యం మార్కెట్ స్వరూపాన్ని పూర్తిగా మార్చివేయడమే కాకుండా, అంతర్జాతీయ వాణిజ్య సంబంధాలపై కూడా తీవ్ర ప్రభావం చూపే అవకాశం ఉందని ఆర్థిక విశ్లేషకులు అంచనా వేస్తున్నారు.
