కేంద్ర ప్రభుత్వం పెట్రోల్ ఎక్స్‌పోర్ట్ డ్యూటీ రద్దు, డీజిల్, ఏటీఎఫ్‌పై పెంపు
సూర్య జాతీయ డెస్క్: అంతర్జాతీయ మార్కెట్‌లో ఇంధన ధరల సరళికి అనుగుణంగా కేంద్ర ప్రభుత్వం పెట్రోలియం ఉత్పత్తుల ఎగుమతి సుంకాలపై (ఎక్స్‌పోర్ట్ డ్యూటీ) మరోసారి కీలక సవరణలు చేసింది. దేశీయంగా ఇంధన లభ్యతను సమతుల్యం చేసే లక్ష్యంతో ఈ నిర్ణయం తీసుకున్నట్లు అధికారిక ప్రకటన వెల్లడించింది. పెట్రోల్‌పై ఇప్పటివరకు ఉన్న ప్రత్యేక అదనపు ఎక్సైజ్ సుంకాన్ని (SAED) పూర్తిగా తొలగిస్తూ కేంద్ర ఆర్థిక మంత్రిత్వ శాఖ నిర్ణయం తీసుకుంది. దీనివల్ల పెట్రోల్ ఎగుమతులపై పడుతున్న భారం పూర్తిగా తొలగిపోయినట్లయింది.
అదే సమయంలో డిజెల్‌తో పాటు విమాన ఇంధనమైన ఏవియేషన్ టర్బైన్ ఫ్యూయెల్ (ATF) ఎగుమతి లెవీలను ప్రభుత్వం కొద్దిగా పెంచింది. సవరించిన నూతన నిబంధనల ప్రకారం డీజిల్ ఎగుమతిపై సుంకాన్ని లీటరుకు రూ. 8.50 నుంచి రూ. 11.50కి సవరించగా, ఏటీఎఫ్ (ATF) ఎగుమతి సుంకాన్ని లీటరుకు రూ. 10.50 నుంచి రూ. 11కి పెంచినట్లు మంత్రిత్వ శాఖ వెల్లడించింది. అంతర్జాతీయంగా ముడిచమురు, రిఫైండ్ పెట్రోలియం ఉత్పత్తుల ధరల్లో వస్తున్న హెచ్చుతగ్గులను బేరీజు వేసుకుంటూ ప్రభుత్వం ప్రతి పక్షం రోజులకొకసారి ఈ సుంకాలను క్రమం తప్పకుండా సమీక్షిస్తు వస్తోంది.
ప్రపంచ మార్కెట్‌లో భౌగోళిక రాజకీయ ఉద్రిక్తతల నేపథ్యంలో ఇంధన సరఫరా మార్గాల్లో అస్థిరత నెలకొనడంతో గతంలో ఈ ఎగుమతి సుంకాల విధానాన్ని ప్రభుత్వం పునరుద్ధరించిన సంగతి తెలిసిందే. దేశీయ రిఫైనరీలు అత్యధిక లాభాల కోసం స్థానిక అవసరాలను పక్కనపెట్టి ఇంధనాన్ని విదేశాలకు తరలించకుండా నిరోధించడం, తద్వారా దేశంలో ఎటువంటి కొరత తలెత్తకుండా తగినంత ఇంధన నిల్వలను అందుబాటులో ఉంచడం ఈ సర్దుబాట్ల ప్రధాన ఉద్దేశమని ప్రభుత్వం స్పష్టం చేస్తూ వస్తోంది. తాజా మార్పుల ద్వారా పెట్రోల్ ఎగుమతి దారులకు ఊరట లభించగా, డీజిల్ మరియు జెట్ ఫ్యూయెల్ ఎగుమతులపై మాత్రం భారం స్వల్పంగా పెరిగింది.
