విశాఖపట్నం వైద్యుల అరుదైన ఘనత: హైదరాబాద్ మహిళకు సంక్లిష్టమైన వెన్నుపాము కణితి తొలగింపు

సీతమ్మధార, సూర్య : హైదరాబాద్‌కు చెందిన 45 ఏళ్ల మహిళకు విశాఖపట్నంలోని సాయి స్ఫూర్తి హాస్పిటల్ వైద్యులు అరుదైన, సంక్లిష్టమైన వెన్నెముక శస్త్రచికిత్సను విజయవంతంగా నిర్వహించారు. హైదరాబాద్ వాసి అయిన  మంగమ్మ (45) రెండు కాళ్లలో బలహీనత కారణంగా నడవలేని స్థితిలో మెరుగైన చికిత్స కోసం విశాఖపట్నంలోని ప్రముఖ స్పైన్ సర్జన్ డా. అరుణ్ కుమార్  సంప్రదించారు. పరీక్షల్లో ఆమె వెన్నుపాము కాలువలో (టీ8 స్థాయిలో) 'ఇంట్రాడ్యూరల్ స్పైనల్ ట్యూమర్' (కణితి) ఉన్నట్లు తేలింది. నవంబర్ 3న డా. అరుణ్ కుమార్ వి, డా. శరత్ బాబు, డా. గాయత్రిలతో కూడిన వైద్య బృందం అత్యంత క్లిష్టమైన మైక్రోసర్జరీ ద్వారా నాడీ వ్యవస్థకు ఎలాంటి హాని కలగకుండా కణితిని పూర్తిగా తొలగించింది. శస్త్రచికిత్స అనంతరం వేగంగా కోలుకున్న మంగమ్మ , ఇప్పుడు ఎవరి ఆధారం లేకుండా స్వతంత్రంగా నడుస్తున్నారు. ఈ సందర్భంగా డా. అరుణ్ కుమార్ వి మాట్లాడుతూ, "సకాలంలో వ్యాధి నిర్ధారణ, ఖచ్చితమైన మైక్రోసర్జికల్ పద్ధతుల వల్ల రోగి నాడీ వ్యవస్థను కాపాడుతూ కణితిని విజయవంతంగా తొలగించగలిగాము. హైదరాబాద్ నుండి వచ్చి మాపై నమ్మకం ఉంచినందుకు కృతజ్ఞతలు" అని తెలిపారు.