విశాఖ–తిరువణ్ణామలై ప్రత్యేక రైలును రెగ్యులర్ చేయాలి
రోజువారీ లేదా వారానికి రెండుసార్లు నడపాలి
కేంద్ర రైల్వే మంత్రి అశ్వినీ వైష్ణవ్కు బీజేపీ రాష్ట్ర అధ్యక్షుడు పీవీఎన్ మాధవ్ లేఖ
విశాఖపట్నం, నవంబర్ 22 (మేజర్ న్యూస్):
ఉత్తరాంధ్ర శివభక్తుల ప్రయాణ సౌకర్యార్థం విశాఖపట్నం నుంచి తమిళనాడులోని ప్రముఖ పుణ్యక్షేత్రం తిరువణ్ణామలైకు నడుస్తున్న ప్రత్యేక రైలును రెగ్యులర్ ఎక్స్ప్రెస్గా మార్చాలని బీజేపీ రాష్ట్ర అధ్యక్షుడు పీవీఎన్ మాధవ్ కేంద్ర రైల్వే మంత్రి అశ్వినీ వైష్ణవ్ను కోరారు. ఈ మేరకు ఆయన కేంద్ర మంత్రికి లేఖ రాసి భక్తులు ఎదుర్కొంటున్న ప్రయాణ ఇబ్బందులను వివరించారు. ప్రస్తుతం విశాఖ–తిరువణ్ణామలై మధ్య 08579/08580 నంబర్లతో నడుస్తున్న ప్రత్యేక రైలు వారానికి ఒక్కసారి మాత్రమే అందుబాటులో ఉండటంతో యాత్రికులు తీవ్ర ఇబ్బందులు పడుతున్నారని పేర్కొన్నారు. అరుణాచలేశ్వర స్వామి దర్శనం, గిరి ప్రదక్షిణ కోసం ఉత్తరాంధ్ర నుంచి పెద్ద సంఖ్యలో భక్తులు తిరువణ్ణామలైకు వెళ్తుంటారని తెలిపారు. ముఖ్యంగా కార్తీక మాసం, పౌర్ణమి, కార్తీక దీపోత్సవం సందర్భంగా భక్తుల రద్దీ అధికంగా ఉంటుందని వివరించారు. నేరుగా రైలు సౌకర్యం లేకపోవడంతో రెండు, మూడు రైళ్లు మారాల్సి వస్తోందని, దీనివల్ల వృద్ధులు, మహిళలు తీవ్ర ఇబ్బందులు ఎదుర్కొంటున్నారని పేర్కొన్నారు. భక్తుల అవసరాలను దృష్టిలో ఉంచుకుని ప్రత్యేక రైలును శాశ్వత ప్రాతిపదికన రోజువారీ ఎక్స్ప్రెస్గా లేదా కనీసం వారానికి రెండుసార్లు నడిచేలా చర్యలు తీసుకోవాలని విజ్ఞప్తి చేశారు. మాధవ్ విజ్ఞప్తిపై కేంద్ర రైల్వే మంత్రి సానుకూలంగా స్పందించారని, సంబంధిత అధికారులతో చర్చించి సాధ్యాసాధ్యాలను పరిశీలిస్తామని హామీ ఇచ్చినట్లు మాధవ్ వెల్లడించారు. ఉత్తరాంధ్ర భక్తుల ప్రయోజనాల దృష్ట్యా కేంద్ర ప్రభుత్వం త్వరలో సానుకూల నిర్ణయం తీసుకుంటుందని ఆయన ఆశాభావం వ్యక్తం చేశారు.