పెందుర్తిలో జేడీ ఫౌండేషన్ పొలంబడి కార్యక్రమం
పెందుర్తి, (మేజర్ న్యూస్):
పర్యావరణ పరిరక్షణతో పాటు విద్యార్థినుల్లో వ్యవసాయంపై అవగాహన పెంపొందించేందుకు జేడీ ఫౌండేషన్ ఆధ్వర్యంలో ఆదివారం పెందుర్తిలో పొలంబడి కార్యక్రమం నిర్వహించారు. సీబీఐ మాజీ జేడీ వీవీ లక్ష్మీనారాయణ పిలుపు మేరకు ఆంధ్రప్రదేశ్ సాంఘిక సంక్షేమ బాలికల వసతిగృహ ప్రాంగణంలో విద్యార్థినులతో వంగ, మిరప, టమోటా, క్యాబేజీ, కాలీఫ్లవర్ తదితర కూరగాయ మొక్కలతో పాటు పాలకూర, తోటకూర విత్తనాలను నాటించారు. మొక్కల పెంపకం, వాటి సంరక్షణపై విద్యార్థినులకు అవగాహన కల్పించారు. ఈ కార్యక్రమానికి ముఖ్యఅతిథిగా హాజరైన రోటరీ క్లబ్ పోర్ట్సిటీ అధ్యక్షుడు ఎన్ఎస్ఎన్ రాజు మాట్లాడుతూ చిన్నతనం నుంచే విద్యార్థులకు మొక్కల పెంపకం, పర్యావరణ పరిరక్షణపై అవగాహన కల్పించడం అభినందనీయమన్నారు. విశాఖ మహానగరంలో పెద్దఎత్తున మొక్కలు నాటడంతో పాటు వర్షపు నీటిని సంరక్షించే కార్యక్రమాలను త్వరలో చేపట్టనున్నట్లు తెలిపారు. కార్యక్రమంలో వసతిగృహ సంక్షేమాధికారి సత్య, పీటీజీ మిద్దెతోటల నిర్వాహకురాలు పి.రేఖ, జేడీ ఫౌండేషన్ సభ్యులు, వసతిగృహ సిబ్బంది పాల్గొన్నారు.