విద్యార్థినుల చదువుకు సైకిళ్ల భరోసా

భోగాపురం, సూర్య : విద్యార్థినుల విద్యాభ్యాసానికి ప్రోత్సాహం అందిస్తూ, వారి ప్రయాణ కష్టాలను తగ్గించాలనే లక్ష్యంతో నాతవలస టోల్ ప్లాజా ఆధ్వర్యంలో సైకిళ్ల పంపిణీ కార్యక్రమం నిర్వహించారు. నేషనల్ హైవే ఇన్‌ఫ్రా ట్రస్ట్ సీఎస్ఆర్ నిధులు సుమారు రూ.70 వేలతో భోగాపురం జిల్లా పరిషత్ ఉన్నత పాఠశాలకు చెందిన పది మంది విద్యార్థినులకు సైకిళ్లను అందజేశారు. కార్యక్రమానికి ముఖ్య అతిథిగా హాజరైన భోగాపురం సర్కిల్ ఇన్‌స్పెక్టర్ అదబాల. రవికుమార్ మాట్లాడుతూ విద్యార్థినులకు సైకిళ్లు అందించడం సంతోషకరమన్నారు. సుదూర ప్రాంతాల నుంచి పాఠశాలకు వచ్చే విద్యార్థినులకు ఇవి ఎంతో ఉపయోగపడతాయని పేర్కొన్నారు. విద్యార్థులు రహదారి భద్రతా నియమాలను పాటిస్తూ, ఎడమవైపు నుంచి ప్రయాణం సాగించాలని సూచించారు. టోల్ ప్లాజా మేనేజర్ జె. రవిబాబు మాట్లాడుతూ సీఎస్ఆర్ నిధులతో రాష్ట్రవ్యాప్తంగా 300కు పైగా సైకిళ్లను పంపిణీ చేసినట్లు తెలిపారు. ఈ క్రమంలో భోగాపురం పాఠశాల విద్యార్థినులకు సైకిళ్లు అందించడం ఆనందంగా ఉందన్నారు. భోగాపురం మండలంలోని సుందరపేట సామాజిక ఆరోగ్య కేంద్రం, పోలీస్ స్టేషన్‌కు వాటర్ ప్యూరిఫైయర్ పరికరాలను కూడా అందజేసినట్లు గుర్తుచేశారు. ఈ కార్యక్రమంలో టోల్ ప్లాజా అధ్యక్షులు చింతపల్లి శ్రీనివాసరావు, టిబిఆర్ మేనేజర్ కేశవమూర్తి, పాఠశాల ప్రధానోపాధ్యాయులు వై. శ్రీనివాసరావు, ఉపాధ్యాయులు, ఇతర సిబ్బంది పాల్గొన్నారు.

రిపోర్టర్ : వై శ్రీనివాస రావు, భోగాపురం, విజయనగరం జిల్లా.