నేరస్థుడిపై మరోసారి పీడీ యాక్ట్‌.. చర్లపల్లి జైలుకు తరలింపు

సైబరాబాద్,మేజర్ న్యూస్ : సైబరాబాద్ పోలీస్ కమిషనర్ డాక్టర్ ఎం. రమేష్, ఐపీఎస్ ఆదేశాల మేరకు నాగరాజు రఘు వర్మ అలియాస్ వంశీపై మరోసారి పీడీ చట్టం ప్రయోగించారు. ఇతడిని గూండాగా పరిగణించి చర్లపల్లి సెంట్రల్ జైలుకు తరలించారు.ఆంధ్రప్రదేశ్‌లోని పశ్చిమ గోదావరి జిల్లాకు చెందిన నిందితుడు, పోలీసు అధికారిగా నటిస్తూ కేసుల నుంచి తప్పిస్తానని నమ్మించి బాధితుల నుంచి డబ్బులు వసూలు చేసేవాడని పోలీసులు తెలిపారు.

 కిడ్నాప్‌లు, తుపాకులతో బెదిరింపులు, దోపిడీలు, బలవంతపు వసూళ్లకు పాల్పడినట్లు ఆరోపణలున్నాయి.2017 నుంచి 2026 మధ్య మోసం, కిడ్నాప్, దోపిడీ, బెదిరింపులు, ఆయుధ చట్టం కింద నమోదైన మొత్తం 14 కేసుల్లో ఇతడు నిందితుడిగా ఉన్నాడు. గతంలో 2021, 2024లోనూ ఇతడిపై పీడీ చట్టం ప్రయోగించారు. జైలు నుంచి విడుదలైన తర్వాత కూడా నేర కార్యకలాపాలు కొనసాగించినట్లు పోలీసులు పేర్కొన్నారు. తాజాగా జగద్గిరిగుట్ట పోలీసులు అరెస్టు చేయగా, మరోసారి నివారణ చర్యగా పీడీ చట్టం అమలు చేశారు.