మాదాపూర్ సున్నం చెరువులో అక్రమ నీటి దందాపై హైడ్రా ఉక్కుపాదం....అక్రమ బోర్లను ద్వంసం చేసిన హైడ్రా
మాదాపూర్,మేజర్ న్యూస్ : నగరంలో అక్రమ నీటి వ్యాపారానికి అడ్డుకట్ట వేసేందుకు హైడ్రా అధికారులు చర్యలు చేపట్టారు. మాదాపూర్‌లోని సున్నం చెరువు పరిసరాల్లో అక్రమంగా బోర్లు వేసి, పైప్‌లైన్ల ద్వారా నీటిని ట్యాంకర్లతో సరఫరా చేస్తున్నట్లు గుర్తించి వాటిని తొలగించారు. శనివారం ఉదయం చేపట్టిన ఈ చర్యల్లో జేసీబీల సాయంతో భూగర్భంలో ఏర్పాటు చేసిన పైప్‌లైన్‌ నెట్‌వర్క్‌ను ధ్వంసం చేశారు.
చెరువు పరిసర బస్తీల్లో కొందరు అక్రమంగా లోతైన బోర్లు వేసి భూగర్భ జలాలను తోడుతున్నట్లు అధికారులు గుర్తించారు. అక్కడి నుంచి భారీ పైప్‌లైన్ల ద్వారా నీటిని తరలిస్తూ, రోజూ పెద్ద సంఖ్యలో ట్యాంకర్లతో నగరంలోని వివిధ ప్రాంతాలకు సరఫరా చేస్తున్నట్లు విచారణలో వెల్లడైనట్లు సమాచారం.
చెరువు పరిసరాల్లోని నీటిలో రసాయనాలు, భారీ లోహాలు ఉండే ప్రమాదం ఉందని, శుద్ధి చేయకుండానే విక్రయిస్తుండటంతో ప్రజారోగ్యానికి ముప్పు పొంచి ఉందని అధికారులు ఆందోళన వ్యక్తం చేసినట్లు కథనం పేర్కొంది. ఈ నేపథ్యంలో అక్రమ బోర్ల తొలగింపుతో పాటు పైప్‌లైన్‌ వ్యవస్థను ధ్వంసం చేశారు.అక్రమ నీటి వ్యాపారాన్ని అరికట్టేందుకు పరిసర ప్రాంతాల్లో నిఘా పెంచినట్లు అధికారులు తెలిపారు. నిబంధనలకు విరుద్ధంగా వ్యవహరిస్తే కఠిన చర్యలు తీసుకుంటామని హెచ్చరించారు.
