కూచిపూడి గ్రేడ్ పరీక్షలను నిర్వహించిన అఖిల భారత కళా సాధన పరిషత్

రవీంద్ర భారతి, మేజర్ న్యూస్  : రుద్ర కళాక్షేత్రం కల్చరల్ సొసైటీ ఆధ్వర్యంలో అఖిల భారత కళా సాధన పరిషత్ నిర్వహిస్తున్న కూచిపూడి నాట్య విభాగం 2026 ద్వైవార్షిక గ్రేడ్ పరీక్షలు హైదరాబాద్ లోని స్థానిక శ్రీ అర్ధ నారీశ్వర కూచిపూడి డాన్స్ అకాడమీ లో శనివారం విజయవంతంగా నిర్వహించబడ్డాయి. వివిధ స్థాయిలలో జరిగిన ఈ పరీక్షలకు నాట్యాచారిమణులు రాణి ప్రియ, ఎస్. భార్గవి, టి. సాయి ప్రియ శిష్యులు సుమారు 120 మంది హాజరై తమ నాట్య ప్రతిభను ప్రదర్శించారు. ఈ సందర్భంగా రుద్ర కళాక్షేత్రం వ్యవస్థాపకులు మాచిరాజు రాజేష్ మాట్లాడుతూ.. కూచిపూడి వంటి శాస్త్రీయ కళలను చిన్ననాటి నుంచే క్రమబద్ధమైన శిక్షణతో అభ్యసించడం ఎంతో ముఖ్యమని అన్నారు. పరీక్షలు విద్యార్థుల్లో కేవలం మార్కులు లేదా గ్రేడ్‌ల కోసం కాకుండా, క్రమశిక్షణ, సాధన, నాట్య పరిజ్ఞానంతో వేదికపై ప్రదర్శించే సామర్థ్యాన్ని పెంపొందించేందుకు ఒక ముఖ్యమైన అవకాశంగా ఉపయోగపడతాయని తెలిపారు.
“కళను నేర్చుకోవడం ఒక నిరంతర సాధన. విద్యార్థులు గురువుల వద్ద నేర్చుకున్న అంశాలను క్రమం తప్పకుండా సాధన చేస్తూ..పరీక్షల ద్వారా తమ అభ్యాసాన్ని ఒక దశ నుంచి మరో దశకు తీసుకెళ్లాలన్నారు . కూచిపూడి కళను భవిష్యత్ తరాలకు అందించడంలో ఇటువంటి క్రమబద్ధమైన పరీక్షా విధానం ఎంతో ఉపయోగపడుతుందిని రాజేష్ తెలిపారు. ఈ పరీక్షల నిర్వహణలో శ్రీఅర్ధ నారీశ్వర కూచిపూడి డాన్స్ అకాడమీ వ్యవస్థాపకులు గెల్లంకి రాణి ప్రియ , సిబ్బందితో పాటు స్థానిక గురువులు సమన్వయంతో వ్యవహరించారు. రుద్ర కళాక్షేత్రం కల్చరల్ సొసైటీ ఆధ్వర్యంలో అఖిల భారత కళా సాధన పరిషత్ కూచిపూడి గ్రేడ్ పరీక్షలను ఆంధ్రప్రదేశ్, తెలంగాణ రాష్ట్రాలలో క్రమం తప్పకుండా నిర్వహిస్తూ.. విద్యార్థులకు శాస్త్రీయ నాట్య విద్యలో ప్రామాణికమైన అభ్యాస వాతావరణాన్ని అందించేందుకు కృషి చేస్తోందని నిర్వాహకులు తెలిపారు.