వెంకన్న సన్నిధిలో జగద్గురు శంకరాచార్య స్వామీజీ
కోనసీమ వాడపల్లి శ్రీ వేంకటేశ్వర స్వామి వారిని పూరి గోవర్ధన్ పీఠానికి చెందిన జగద్గురు శంకరాచార్య శ్రీ శ్రీ శ్రీ ఆద్యోక్షజానంద స్వామీజీ శుక్రవారం దర్శించుకున్నారు. ఆలయానికి విచ్చేసిన పూజ్య శంకరాచార్యులకు ఆలయ అధికారులు, అర్చక బృందం పూర్ణకుంభంతో సాదర స్వాగతం పలికారు. అనంతరం స్వామీజీ గర్భాలయంలో కొలువుదీరిన వేంకటేశ్వర స్వామి వారిని ప్రత్యేకంగా దర్శించుకుని ప్రత్యేక పూజలు నిర్వహించారు.
దర్శనానంతరం అర్చక స్వాములు శంకరాచార్యులకు వేదాశీర్వచనం అందజేసి, స్వామివారి శేషవస్త్రాలు, దివ్య చిత్రపటం మరియు తీర్థప్రసాదాలను సమర్పించారు. ఈ సందర్భంగా స్వామీజీ అనుగ్రహ భాషణం చేస్తూ.. సనాతన ధర్మ రక్షణ, వేద సంస్కృతి పరిరక్షణ, గోసంరక్షణ మరియు పర్యావరణ పరిరక్షణల ప్రాముఖ్యతను వివరించారు. సమాజంలో నైతిక, ధార్మిక విలువలను పెంపొందించాల్సిన అవసరం ఎంతైనా ఉందని ఉద్ఘాటించారు. భారతీయ ప్రాచీన ఆధ్యాత్మిక సంప్రదాయాలను, వేద జ్ఞానాన్ని భావితరాలకు సజీవంగా అందించడంలో ప్రతి ఒక్కరూ తమ వంతు బాధ్యతను నిర్వర్తించాలని ఆయన పిలుపునిచ్చారు. ఈ కార్యక్రమంలో ఆలయ ఉన్నతాధికారులు, అర్చకులు, భక్తులు పెద్ద సంఖ్యలో పాల్గొన్నారు.
