వీఎస్‌యూలో ఘనంగా నషా ముక్త యువ, జాతీయ ఐక్యతా దినోత్సవ వేడుకలు
వెంకటాచలం మేజర్ న్యూస్ : విక్రమ సింహపురి విశ్వవిద్యాలయంలో శనివారం నషా ముక్త యువ 100 రోజుల కార్యక్రమంతో పాటు జాతీయ ఐక్యతా దినోత్సవ వేడుకలను ఘనంగా నిర్వహించారు. ఈ సందర్భంగా ఉపకులపతి ఆచార్య అల్లం శ్రీనివాసరావు మాట్లాడుతూ యువత మాదకద్రవ్యాలు, చెడు వ్యసనాలకు దూరంగా ఉంటూ ఆరోగ్యవంతమైన సమాజ నిర్మాణానికి కృషి చేయాలని పిలుపునిచ్చారు. అనంతరం సర్దార్ వల్లభాయ్ పటేల్ జయంతిని పురస్కరించుకుని ఆయన చిత్రపటానికి పూలమాలలు వేసి నివాళులర్పించారు. దేశ సమైక్యత, సమగ్రతను కాపాడటం ప్రతి పౌరుడి బాధ్యతని పేర్కొన్నారు. ఈ సందర్భంగా విద్యార్థులతో మాదకద్రవ్యాలకు వ్యతిరేకంగా ప్రతిజ్ఞ చేయించి, అవగాహన ర్యాలీ నిర్వహించారు. కార్యక్రమంలో రిజిస్ట్రార్ ఆచార్య కె. సునీత, కళాశాల ప్రిన్సిపల్ ఆచార్య టి. వీరారెడ్డి, ఎన్ఎస్ఎస్ ప్రోగ్రామ్ అధికారులు డా. నాగభూషణరావు, డా. పి.బి. సుచరిత, అధ్యాపకులు, విద్యార్థులు పాల్గొన్నారు.
